హాలీవుడ్ లో విషాదం నెలకొంది. ప్రముఖ దర్శకుడు, నటుడు రాబ్ రీనర్ (Rob Reiner) (78), ఆయన సతీమణి మిచెల్ సింగర్ (Michele Singer) (68) దంపతులు లాస్ ఏంజెలెస్ (Los Angeles)లోని బ్రెంట్వుడ్ (Brentwood) నివాసంలో దారుణ హత్యకు గురయ్యారు. ఆదివారం మధ్యాహ్నం వారి ఇద్దరి మృతదేహాలు రక్తపు మడుగుల్లో కనిపించడంతో హాలీవుడ్ ప్రపంచం ఒక్కసారిగా ఉలిక్కిపడింది.
లాస్ ఏంజిల్స్ అగ్నిమాపక దళం (LA Fire Department) అందించిన సమాచారం మేరకు పోలీసులు ఘటనా స్థలానికి చేరుకున్నారు. రీనర్ దంపతుల శరీరాలపై అనేక కత్తిపోట్లు ఉన్నట్లు అధికారులు ధృవీకరించారు. మృతదేహాలను పరిశీలించిన లాస్ ఏంజిల్స్ పోలీస్ లు దర్యాప్తు చేపట్టారు.. ఈ ఘటనపై పోలీసులు ఇప్పటికీ పూర్తి వివరాలు, హత్య వెనుక ఉద్దేశ్యం గురించి అధికారికంగా ప్రకటించనప్పటికీ, స్థానిక అమెరికన్ మీడియా మాత్రం సంచలన కథనాలను ప్రచురిస్తోంది.
కుమారుడే హంతకుడా?
స్థానిక మీడియా కథనాల ప్రకారం, ఈ ఘాతుకానికి పాల్పడింది రీనర్ దంపతుల సొంత కుమారుడు నిక్ రీనర్ (Nick Reiner) అని తెలుస్తోంది. నిక్ గతంలో ఒక ఇంటర్వ్యూలో తాను మాదక ద్రవ్యాలకు బానిసనని వెల్లడించడం ఈ అనుమానాలకు మరింత బలం చేకూర్చింది. అయితే, ఈ ఆరోపణలపై నిక్ రీనర్ నుంచి ఎలాంటి స్పందన రాలేదు. నిక్ రీనర్కు జాక్, రోమీ అనే తోబుట్టువులు కూడా ఉన్నారు. అలాగే, రాబ్ రీనర్ మొదటి భార్య,దివంగత నటి పెన్నీ మార్షల్ కుమార్తె, నటి ట్రేసీ రీనర్ ను దత్తత తీసుకున్నారు.
దిగ్గజ దర్శకుడిగా..
రాబ్ రీనర్ తన ఐదు దశాబ్దాల సుదీర్ఘ కెరీర్లో హాలీవుడ్పై చెరగని ముద్ర వేశారు. లెజెండరీ హాస్యనటుడు కార్ల్ రీనర్ కుమారుడైన రాబ్, “ఆల్ ఇన్ ది ఫ్యామిలీ” అనే సిట్కామ్లో మైఖేల్ “మీట్హెడ్” స్టివిక్ పాత్రతో ప్రేక్షకులకు దగ్గరయ్యారు. ఆ పాత్రకు గాను ఆయన రెండు ప్రతిష్టాత్మక ఎమ్మీ అవార్డులు గెలుచుకున్నారు. నటుడిగా మెప్పించిన రీనర్, దర్శకుడిగా అంతకుమించిన కీర్తిని పొందారు. ‘దిస్ ఈజ్ స్పైనల్ ట్యాప్’ (This Is Spinal Tap) చిత్రంతో దర్శకుడిగా అరంగేట్రం చేశారు. ఆ తర్వాత ‘స్టాండ్ బై మి’ (Stand By Me), ‘ది ప్రిన్సెస్ బ్రైడ్’ (The Princess Bride), ‘వెన్ హ్యారీ మెట్ సాలీ’ (When Harry Met Sally), ‘మిసరీ’ (Misery), ‘ఎ ఫ్యూ గుడ్ మెన్’ (A Few Good Men) వంటి ఎన్నో కల్ట్ క్లాసిక్ చిత్రాలను తెరకెక్కించి అంతర్జాతీయ స్థాయిలో పేరు తెచ్చుకున్నారు. 1987లో ఆయన కో-ఫౌండర్గా స్థాపించిన ‘కాజిల్ రాక్ ఎంటర్టైన్మెంట్’ సంస్థ అనేక హిట్ చిత్రాలను నిర్మించింది.
రీనర్ దంపతుల హత్య వార్త తెలుసుకున్న హాలీవుడ్ ప్రముఖులు తీవ్ర దిగ్భ్రాంతి వ్యక్తం చేస్తూ, సోషల్ మీడియా వేదికగా సంతాపం ప్రకటిస్తున్నారు. ప్రస్తుతం లాస్ ఏంజెలెస్ పోలీసులు ఈ కేసును అత్యంత కీలకంగా దర్యాప్తు చేస్తున్నారు. త్వరలోనే హంతకుడు, హత్య వెనుక అసలు ఉద్దేశ్యం వెల్లడయ్యే అవకాశం ఉంది.