జూబ్లీహిల్స్, వెలుగు: అంబేద్కర్ దళిత్ స్టడీ సర్కిల్ను రాష్ట్రవ్యాప్తంగా ఒక ఆదర్శవంతమైన విద్యా కేంద్రంగా తీర్చిదిద్దుతామని మంత్రి అడ్లూరి లక్ష్మణ్ వెల్లడించారు. జూబ్లీహిల్స్ ఎస్.పి.ఆర్ హిల్స్లో ఉన్న స్టడీ భవనాన్ని ఎమ్మెల్యే నవీన్ యాదవ్, స్టడీ సెంటర్ చైర్మన్ మల్లేపల్లి లక్ష్మయ్యతో కలిసి శనివారం ఆయన పరిశీలించారు.
భవనంలోని వసతి గృహ గదులు, భోజనశాల, గ్రంథాలయం, స్టడీ హాల్ను సందర్శించి అక్కడి సౌకర్యాలపై అధికారులతో సమీక్షించారు. దళిత విద్యార్థుల సామాజిక, విద్యాభివృద్ధికి ఈ స్టడీ సర్కిల్ కీలక వేదికగా మారుతుందని ఆశాభావం వ్యక్తం చేశారు. త్వరలోనే సీఎం రేవంత్ రెడ్డి చేతుల మీదుగా ఈ భవనాన్ని ప్రారంభించనున్నట్లు తెలిపారు.