అవని వొళ్ళు విరుచుకుంటుంది
మట్టి సుగంధ పరిమళమై గాలిలో తేలుతుంది
ఎండి పగుళ్ళు బారిన మట్టి దేహాలు ఒక్కటవుతాయి
పలపల రాలే చినుకులు
రైతుల గుండెల్లో ఆనంద తాండవమాడతాయి
పొలాల్లో నాగళ్ళు నాట్యం చేస్తాయి
పచ్చని పైరు తల్లులు హాయిగా తలలూపుతాయి
వానొస్తే మనిషి జీవితమే పులకరించి పోతుంది
మనుషుల్లో ఆత్మీయతానురాగాలు నింపుతుంది
వానొస్తే అడవి విరబూస్తుంది
చెట్టూ పుట్టా కనికరిస్తాయి
పువ్వూ పిట్టా పలకరిస్తాయి
నెమళ్లు ఆనందంతో నాట్యం చేస్తాయి
వానొస్తే వరదొస్తే ఆకాశం ఇంద్రధనుస్సయితే
భూమి అణువణువూ పరవశించి పరవళ్లు తొక్కుతుంది
వానొస్తే బాల్యం ఎగిరెగిరి దూకుతుంది
చినుకుల్లో పడుతూ లేస్తూ చిందులేస్తుంది
నీళ్లల్లో పడవ విహారాలు చేస్తుంది
వానొస్తే ముసలీ ముతకా చెట్టూ చేమా
బతికి బట్ట కడుతుంది
వానొస్తే వాతావరణమే కాదు
మనిషి జీవితమే చల్లబడిపోతుంది
వానొస్తే మనిషే మొలకెత్తి
మానవతై పచ్చగా చిగురిస్తాడు
– మంచికంటి