ప్రకృతి అందాలకు నిలయమైన ఉత్తర కాశ్మీర్ ఇప్పుడు మంచులో చిక్కుకుంది. గత రెండు రోజులుగా కురుస్తున్న భారీ మంచు వర్షంతో జనజీవనం పూర్తిగా స్థంభించిపోయింది. ముఖ్యంగా బండిపోరా జిల్లాలోని వ్యూహాత్మక ప్రాంతమైన గూరేజ్ సెక్టార్, భారీ హిమపాతం కారణంగా జిల్లా కేంద్రంతో సంబంధాలు తెగిపోయి పూర్తిగా ఏకాకిగా మారింది. గూరేజ్ లోయలోని ఎత్తైన ప్రాంతాల్లో మంచు బీభత్సం సృష్టిస్తోంది. తులైల్ వ్యాలీలో సుమారు 4 అంగుళాల మేర మంచు పేరుకుపోయింది. ఇక్కడ కిల్షయ్ వంటి ప్రాంతాల్లో ఇప్పటికీ మంచు వర్షం నిరంతరాయంగా కురుస్తూనే ఉంది. సముద్ర మట్టానికి అత్యంత ఎత్తులో ఉండే రజదాన్ పాస్ వద్ద ఏకంగా 7 అంగుళాల మంచు పేరుకుపోయింది. దీంతో ఆ ప్రాంతమంతా మంచుదుప్పటి కప్పుకున్నట్లుగా మారిపోయింది. దట్టంగా మంచు పేరుకుపోవడంతో ప్రయాణాలు అత్యంత ప్రమాదకరంగా మారాయి. ఫలితంగా 85 కిలోమీటర్ల పొడవైన గూరేజ్-బండిపోరా రహదారిని అధికారులు వరుసగా రెండో రోజు కూడా మూసివేశారు. వాహనాల రాకపోకలు నిలిచిపోవడంతో గూరేజ్ ప్రాంతానికి బాహ్య ప్రపంచంతో సంబంధాలు తెగిపోయాయి. అత్యవసర సేవలకు కూడా ఆటంకం కలుగుతుండటంతో స్థానికులు తీవ్ర ఇబ్బందులు పడుతున్నారు. పరిస్థితిని విపత్తు నిర్వహణ శాఖ అధికారులు నిశితంగా పరిశీలిస్తున్నారు. మంచును తొలగించే యంత్రాలను సిద్ధం చేసినప్పటికీ, వాతావరణం అనుకూలించకపోవడంతో పనులు నెమ్మదిగా సాగుతున్నాయి. వాతావరణం మెరుగుపడే వరకు ప్రజలు ఎవరూ ఇళ్ల నుంచి బయటకు రావద్దని, ఎత్తైన ప్రాంతాలకు ప్రయాణాలు పెట్టుకోవద్దని అధికారులు హెచ్చరికలు జారీ చేశారు. ప్రస్తుతానికి గూరేజ్ లోయ మొత్తం ఒక తెల్లని మంచు ఖండంలా మారిపోయింది, ప్రకృతి అందం ఉట్టిపడుతున్నా.. అక్కడి ప్రజలకు మాత్రం ఇది గడ్డుకాలంగా మారింది.
మరిన్ని వీడియోల కోసం ఇక్కడ క్లిక్ చేయండి
Also Watch:
ధ్వజస్తంభంపై చిలుక..ఎగిరిపోయిందో.. ప్రళయమే!
పర్యాటకమా ?? ప్రాణ సంకటమా ?? భద్రతా ప్రమాణాలు లేవు
సర్పంచ్ ఇంట్లో వింత శబ్ధాలు.. వెళ్లిచూడగా షాకైన కుటుంబం