గిరిజన ప్రాంతాల్లో ప్రాథమిక ఆరోగ్య కేంద్రాలు, సామూహిక ఆరోగ్య కేంద్రాలను మరింత బలోపేతం చేయాల్సిన అవసరం ఉందని తెలంగాణ గిరిజన సంక్షేమ మంత్రి అడ్లూరి లక్ష్మణ్ కుమార్ అన్నారు. రాష్ట్ర స్థాయి గిరిజన అవసరాలను జాతీయ స్థాయిలో బలంగా వినిపించాల్సిన అవసరం ఉందన్నారు. తెలంగాణలో గోండ్లు, కోయలు, చెంచులు, కోలంలు, కొండ రెడ్డీలు సహా 33 గిరిజన తెగలు ఉన్నాయని తెలిపారు. రవాణా సదుపాయాల లేమి, సమాచార లోపాలు, భాషా-సాంస్కృతిక భేదాలు, ప్రభుత్వ ఆరోగ్య వ్యవస్థపై నమ్మకం లోపించడం వంటి కారణాలు చివరి గ్రామాల వరకు వైద్య సేవలు చేరడాన్ని ప్రభావితం చేస్తున్నాయని మంత్రి వివరించారు.
ఈ పరిస్థితుల్లో విద్య, ఆరోగ్యం రెండూ సమాజ అభివృద్ధికి కీలక అంశాలుగా ఉన్నాయని స్పష్టం చేశారు. కేంద్ర గిరిజన వ్యవహారాల కార్యదర్శి రంజనా చోప్రా మాట్లాడుతూ సమాజ ఆధారిత ఆరోగ్య విధానాల ప్రధాన భూమికను గిరిజన వైద్యులు నిర్వహిస్తున్నారని అన్నారు. ఇవి తక్కువ ఖర్చుతో, స్థిరమైనవిగా ఉండటంతో పాటు స్థానిక అవసరాలకు అనుగుణంగా ఉంటాయని చెప్పారు. మలేరియా, క్షయ, కుష్టు వంటి సంక్రమణ రోగాలు ఇప్పటికీ అనేక గిరిజన జిల్లాల్లో ఉన్నాయని, వాటి నిర్మూలనకు లక్ష్యసాధనతో కూడిన చివరి ప్రయత్నం అవసరమని పేర్కొన్నారు. అదనపు కార్యదర్శి మనీష్ ఠాకూర్ మాట్లాడుతూ గిరిజన వైద్యులకు వారి సమాజాల్లో తరతరాలుగా విశ్వాసం, సామాజిక అంగీకారం ఉన్నాయని చెప్పారు. ముఖ్యంగా నివారణాత్మక వైద్యం, వ్యాధుల తొలిదశ గుర్తింపు, సమయానుకూల రిఫరల్ వంటి అంశాల్లో గిరిజన వైద్యులు కీలక పాత్ర పోషించగలరని పేర్కొన్నారు.