చెన్నై: ఇండియన్ ప్రీమియర్ లీగ్ (ఐపీఎల్) 2026 మిడ్ సీజన్లో చెన్నై సూపర్ కింగ్స్కు మరో ఎదురుదెబ్బ తగిలింది. గాయం కారణంగా ఆ జట్టు యువ ఆల్ రౌండర్ రామకృష్ణ ఘోష్ టోర్నీలో మిగిలిన మ్యాచులకు దూరమయ్యాడు. 2026, మే 2న చెపాక్ వేదికగా ముంబై ఇండియన్స్, చెన్నై జట్లు తలపడ్డ విషయం తెలిసిందే. ఈ మ్యాచ్ ద్వారా యంగ్ ఆల్ రౌండర్ రామకృష్ణ ఘోష్ ఐపీఎల్ అరంగ్రేటం చేశాడు. డెబ్యూ మ్యాచులోనే ఫీల్డింగ్ సమయంలో గాయపడ్డాడు.
గాయం తీవ్రత ఎక్కువగా ఉండటంతో టోర్నీ నుంచి అర్ధాంతరంగా నిష్ర్రమించాడు. ఈ విషయాన్ని సీఎస్కే యాజమాన్యం ఆదివారం (మే 3) అఫిషియల్గా అనౌన్స్ చేసింది. ‘‘చెపాక్లో జరిగిన CSK vs MI మ్యాచ్ సందర్భంగా రామకృష్ణ ఘోష్ కుడి కాలికి ఫ్రాక్చర్ అయింది. అతను IPL 2026లో ఇకపై పాల్గొనడు’’ అని వెల్లడించింది. గాయం నుంచి త్వరగా కోలుకోవాలని ఆకాంక్షించింది.
ముంబై ఇండియన్స్తో జరిగిన మ్యాచ్లో ఘోష్ ఐపీఎల్లో అరంగేట్రం చేశాడు. ఈ ఆ మ్యాచ్లో మూడు ఓవర్లు బౌలింగ్ చేసి 24 పరుగులు ఇచ్చాడు. సూర్యకుమార్ యాదవ్ వికెట్ తీశాడు. ఫీల్డింగ్ చేస్తుండగా విల్ జాక్స్ కొట్టిన బంతిని అందుకునేందుకు డైవ్ చేసి ఫాలో-త్రూలో అతను కిందపడిపోయాడు. దీంతో ఘోష్ కుడి కాలికి గాయమైంది. గాయం తీవ్రత ఎక్కువగా ఉండటంతో కేవలం ఒకే మ్యాచ్ ఆడి టోర్నీకి దూరం కావాల్సి వచ్చింది.
చెన్నైను వెంటాడుతోన్న గాయాల బెడద
ఈ సీజన్ ప్రారంభం నుంచే చెన్నై సూపర్ కింగ్స్ను గాయాల బెడద వెంటాడుతోంది. టోర్నమెంట్ ప్రారంభానికి ముందే ఫాస్ట్ బౌలర్ నాథన్ ఎల్లిస్ టోర్నీ నుంచి తప్పుకోగా అతని స్థానంలో స్పెన్సర్ జాన్సన్ జట్టులోకి వచ్చాడు. స్పెన్సర్ జాన్సన్ కూడా గాయపడ్డాడు. ఆ తర్వాత స్టార్ బౌలర్ ఖలీల్ అహ్మద్ కూడా గాయం కారణంగా టోర్నీ నుంచి అర్ధాంతరంగా వైదొలగాల్సి వచ్చింది. సూపర్ ఫామ్లో ఉన్న స్టార్ బ్యాటర్ ఆయుష్ మాత్రే కూడా గాయపడి టోర్నీకి దూరమయ్యాడు. మాత్రే స్థానంలో ఆకాష్ మధ్వాల్ ఎంపికయ్యాడు.