అనంతపురం జిల్లా యల్లనూరు జెడ్పీ ఉన్నత పాఠశాలలో తీవ్ర కలకలం రేపిన ఘటనపై జిల్లా విద్యాశాఖ అధికారులు కఠిన చర్యలు తీసుకున్నారు. విద్యార్థినుల పట్ల అసభ్యకరంగా ప్రవర్తిస్తున్నాడనే ఆరోపణలు ఎదుర్కొంటున్న ఫిజికల్ సైన్స్ ఉపాధ్యాయుడు శ్రీరామమూర్తిపై సస్పెన్షన్ వేటు వేశారు. పాఠశాలలో విద్యార్థినుల పట్ల సదరు ఉపాధ్యాయుడు అనుచితంగా ప్రవర్తిస్తున్నాడని, అవాంఛనీయంగా తాకుతున్నాడని కొద్ది రోజులుగా ఆరోపణలు వచ్చాయి. ఈ విషయమై బాధితులు తమ తల్లిదండ్రులకు ఫిర్యాదు చేయడంతో వారు ఆగ్రహంతో పాఠశాలకు చేరుకుని ఆందోళన చేపట్టారు. దీంతో పాఠశాల ఆవరణలో ఉద్రిక్త వాతావరణం నెలకొంది. సమాచారం అందుకున్న మండల విద్యాశాఖ అధికారి (ఎంఈఓ) యల్.పి. చంద్రశేఖర్ వెంటనే అక్కడికి చేరుకుని తల్లిదండ్రులకు నచ్చజెప్పి పరిస్థితిని అదుపులోకి తీసుకువచ్చారు.
తల్లిదండ్రుల తీవ్ర నిరసనలు, ఫిర్యాదుల నేపథ్యంలో జిల్లా విద్యాశాఖ అధికారులు విచారణకు ఆదేశించారు. అధికారుల ప్రాథమిక విచారణలో దిగ్భ్రాంతికర విషయాలు వెలుగులోకి వచ్చాయి. సదరు ఉపాధ్యాయుడు గతంలో పనిచేసిన పలు పాఠశాలల్లోనూ ఇలాంటి అసభ్య ప్రవర్తనకు సంబంధించి పలు ఫిర్యాదులు ఉన్నట్లు అధికారులు గుర్తించారు. ఆ ఉపాధ్యాయుడి ప్రవర్తనపై గతంలోనూ విమర్శలు ఉన్నప్పటికీ తీరు మార్చుకోకపోవడం గమనార్హం.
ఈ వ్యవహారంపై విచారణాధికారులు సమర్పించిన సమగ్ర నివేదికను పరిశీలించిన ఉన్నతాధికారులు, ఆరోపణలు నిజమేనని ప్రాథమికంగా నిర్ధారణకు వచ్చారు. దీంతో మంగళవారం రోజున ఫిజికల్ సైన్స్ టీచర్ శ్రీరామమూర్తిని విధుల్లో నుంచి సస్పెండ్ చేస్తూ విద్యాశాఖ అధికారికంగా ఉత్తర్వులు జారీ చేసింది. విద్యార్థినుల భద్రతకు ముప్పు కలిగించేలా ప్రవర్తించే వారిపై ఎంతటి వారైనా కఠిన చర్యలు ఉంటాయని, ఇలాంటి సంఘటనలను ఉపేక్షించేది లేదని అధికారులు స్పష్టం చేశారు.