ధోనీ కమ్‌బ్యాక్పై సస్పెన్స్: మెక్‌కల్లమ్ రాకపై సీఎస్‌కే పోస్ట్ వైరల్.. యెల్లో ఆర్మీలో బాజ్‌బాల్ షురూ?

ఐపీఎల్ 2027 (IPL 2027) ప్లేయర్ రిటెన్షన్, రిలీజ్ గడువుతో పాటు వేలం సమీపిస్తుండటంతో ఫ్రాంచైజీలు ఆటగాళ్ల బదిలీలపై (Player Transfers) తీవ్ర ఉత్కంఠ నెలకొంది. ఐదుసార్లు ఐపీఎల్ ట్రోఫీ అందించిన దిగ్గజ హెడ్ కోచ్ స్టీఫెన్ ఫ్లెమింగ్ నిష్క్రమించడంతో, చెన్నై సూపర్ కింగ్స్ (CSK) తదుపరి ప్రధాన కోచ్ ఎవరనే అంశంపై సోషల్ మీడియాలో హాట్ టాపిక్ నడుస్తోంది.

సీఎస్‌కే సోషల్ మీడియా పోస్ట్:

సీఎస్‌కే తన అధికారిక ‘X’ (ట్విట్టర్) ఖాతాలో షేర్ చేసిన ఒక క్విజ్ పోస్ట్ అభిమానుల్లో పెద్ద చర్చకు దారితీసింది. గతంలో సీఎస్‌కే తరఫున ఆడుతూ 56 బంతుల్లో సెంచరీ చేసిన మాజీ న్యూజిలాండ్ కెప్టెన్ స్కోర్‌కార్డ్‌ను షేర్ చేస్తూ, ప్లేయర్ పేరును దాచిపెట్టి ఊహించమని కోరింది. దీనికి సమాధానంగా అభిమానులు బ్రెండన్ మెక్‌కల్లమ్ (Brendon McCullum) అని, ఆయనే సీఎస్‌కే తదుపరి హెడ్ కోచ్ అని కామెంట్ల వర్షం కురిపించారు.

మెక్‌కల్లమ్ కోచ్‌గా రాబోతున్నారా?:

బ్రెండన్ మెక్‌కల్లమ్ గతంలో సీఎస్‌కే తరఫున 2 సీజన్లలో 33 మ్యాచులు ఆడి 136.53 స్ట్రైక్ రేట్‌తో 968 పరుగులు చేశారు. 44 ఏళ్ల మెక్‌కల్లమ్ ప్రస్తుతం ఇంగ్లాండ్ వైట్ బాల్ జట్టు హెడ్ కోచ్‌గా కొనసాగుతున్నారు. 2027 వన్డే వరల్డ్ కప్ వరకు ఆయన కాంట్రాక్ట్ అమల్లో ఉండే అవకాశం ఉంది. ఒకవేళ సీఎస్‌కే హెడ్ కోచ్ బాధ్యతలు స్వీకరించాలంటే ఆయన ఇంగ్లాండ్ కోచింగ్ పదవికి రాజీనామా చేయాల్సి ఉండటంతో పాటు ఈసీబీ నుంచి ప్రత్యేక అనుమతి పొందాల్సి ఉంటుంది.

సీఎస్‌కే కెప్టెన్సీ మార్పు?:

ఐపీఎల్ 2026 సీజన్‌లో చెన్నై సూపర్ కింగ్స్ వరుసగా మూడోసారి ప్లేఆఫ్స్‌కు అర్హత సాధించలేక తీవ్రంగా నిరాశపరిచింది. సంజూ శాంసన్, ఆయుష్ మాత్రే, కార్తీక్ శర్మ, నూర్ అహ్మద్, అన్షుల్ కాంబోజ్, క్రెయిగ్ ఓవర్టన్ లాంటి ఆటగాళ్లు రాణించారు. జట్టును ప్లేఆఫ్స్‌కు తీసుకెళ్లడంలో కెప్టెన్ రుతురాజ్ గైక్వాడ్ పూర్తిగా విఫలమవ్వడంతో, కొత్త కోచ్ రాకతో నాయకత్వ బాధ్యతల్లో మార్పులు చోటు చేసుకునే అవకాశాలు ఎక్కువగా కనిపిస్తున్నాయి.

హార్దిక్ పాండ్యా ట్రేడ్.. ధోనీ కమ్‌బ్యాక్ పై సస్పెన్స్:

మరోవైపు ముంబై ఇండియన్స్ నుంచి స్టార్ ఆల్‌రౌండర్ హార్దిక్ పాండ్యాను ట్రేడ్ చేసుకునేందుకు సీఎస్‌కేతో పాటు పలు ఫ్రాంచైజీలు తీవ్రంగా పోటీ పడుతున్నాయి. దీంతో పాటు వివిధ కారణాల వల్ల గత సీజన్ మొత్తానికి దూరమైన ఎంఎస్ ధోనీ, ఐపీఎల్ 2027లో మళ్లీ మైదానంలోకి అడుగుపెడతారా లేదా అనే అంశం ఇంకా మిస్టరీగానే కొనసాగుతుంది.  

Leo is just bored!
Remember, not everything needs decoding👀#WhistlePodu pic.twitter.com/3MYcuOVeLF

— Chennai Super Kings (@ChennaiIPL) August 11, 2026