జుట్టు విపరీతంగా రాలిపోతోందా? ఒత్తిడి, కాలుష్యమే కారణమనుకుని వదిలేస్తున్నారా? అయితే మీ శరీరంలో ప్రొటీన్ తగ్గుతోందేమో ఒక్కసారి గమనించండి. మన జుట్టు ఆరోగ్యంగా పెరగడంలో ప్రొటీన్ పాత్ర చాలా కీలకమైనది. ప్రొటీన్ తగ్గితే జుట్టుపై ఎలాంటి ప్రభావం పడుతుంది, ఎలాంటి జాగ్రత్తలు తీసుకోవాలో సులభంగా తెలుసుకుందాం.
జుట్టుకు, ప్రొటీన్కు ఉన్న సంబంధం: మన జుట్టు ప్రధానంగా ‘కెరాటిన్’ అనే ప్రొటీన్తోనే తయారవుతుంది. ఇక మనం తినే ఆహారంలో ప్రొటీన్ లోపిస్తే, శరీరం తన వద్ద ఉన్న పోషకాలను ముందుగా గుండె, మెదడు, కాలేయం వంటి ముఖ్యమైన అవయవాలకు పంపుతుంది. దీనివల్ల జుట్టుకు ప్రొటీన్ అందక పెరగడం ఆగిపోవడమే కాకుండా రాలడం మొదలవుతుంది.
ప్రొటీన్ లోపం ఇతర లక్షణాలు: కేవలం జుట్టు రాలడమే కాకుండా శరీరంలో ప్రొటీన్ తగ్గితే మరికొన్ని లక్షణాలు కూడా కనిపిస్తాయి. ఇక కండరాలు బలహీనపడటం, త్వరగా అలసిపోవడం, గోళ్లు విరిగిపోవడం, చర్మం పొడిబారడం, గాయాలు త్వరగా మానకపోవడం మరియు శరీరంలో వాపులు రావడం వంటి సమస్యలు ఎదురవుతాయి.
జుట్టు రాలడానికి ఇతర కారణాలు: జుట్టు రాలడానికి ప్రతిసారీ ప్రొటీన్ లోపమే కారణం కాకపోవచ్చు. తీవ్రమైన ఒత్తిడి, హార్మోన్ల అసమతుల్యత, థైరాయిడ్ సమస్యలు, ఐరన్ లేదా విటమిన్ డి, బి12 లోపం, జన్యుపరమైన కారణాల వల్ల కూడా జుట్టు ఎక్కువగా రాలే అవకాశం ఉంది.
ఆహారంలో ఏం తీసుకోవాలి?: ప్రొటీన్ లోపాన్ని జయించడానికి రోజూ తీసుకునే ఆహారంలో పప్పుధాన్యాలు, రాజ్మా, శనగలు, పాలు, పెరుగు, పనీర్, గుడ్లు, చేపలు, చికెన్ చేర్చుకోవాలి. ఇక శాకాహారులు బాదం, వాల్నట్స్, గుమ్మడికాయ గింజలు, చియా గింజలు తీసుకోవడం ద్వారా తగినంత ప్రొటీన్ పొందోచ్చు.
ఆరోగ్యకరమైన ఆహారం తీసుకోవడం ద్వారా జుట్టు రాలడాన్ని చాలావరకు తగ్గించుకోవచ్చు. ఒకవేళ మంచి ఆహారం తీసుకుంటున్నా, సరైన సంరక్షణ పాటిస్తున్నా జుట్టు రాలడం తగ్గకపోతే మాత్రం సొంత వైద్యం చేసుకోకుండా నిపుణులైన వైద్యులను సంప్రదించి పరీక్షలు చేయించుకోవడం మంచిది.
గమనిక: పైన అందించిన సమాచారం నిపుణుల సలహాలు, సాధారణ ఆరోగ్య సూచనల ఆధారంగా ఇవ్వబడింది. ఇది ఏ రకమైన వైద్య చికిత్సకు ప్రత్యామ్నాయం కాదు. మీ ఆరోగ్య పరిస్థితిని బట్టి తగిన సలహా కోసం డాక్టర్ను సంప్రదించగలరు.
The post ప్రొటీన్ తగ్గితే జుట్టుపై ప్రభావం ఎలా ఉంటుంది? తెలుసుకోండి! appeared first on Manalokam – Latest Telugu News & Updates.