ఇబ్రహీంపట్నం, వెలుగు: ‘ఫ్యూచర్ సిటీ’ పోలీస్ కమిషనరేట్ తాత్కాలిక కార్యాలయం సోమవారం ప్రారంభమైంది. రంగారెడ్డి జిల్లా మహేశ్వరం మండలం తుక్కుగూడ (ఫాబ్ సిటీ)లోని టీజీఐఐసీ భవనంలో ఏర్పాటు చేసిన ఈ కార్యాలయాన్ని డీజీపీ శివధర్ రెడ్డి, సీపీ జి.సుధీర్ బాబు కలిసి ప్రారంభించారు. ఈ సందర్భంగా సీపీ మాట్లాడుతూ.. ఓఆర్ఆర్ సర్వీస్ రోడ్డుకు ఆనుకుని ఉండటం వల్ల ఈ భవనం రవాణాపరంగా ప్రజలకు ఎంతగానో అందుబాటులో ఉంటుందన్నారు.
మీర్ ఖాన్పేట్లో శాశ్వత భవనం కోసం ప్రభుత్వం 24 ఎకరాల స్థలాన్ని, రూ.25 కోట్ల నిధులను కేటాయించిందని, రెండేండ్లలో నిర్మాణం పూర్తి చేసి అక్కడికి తరలిస్తామని వెల్లడించారు. సైబరాబాద్, హైదరాబాద్ తరహాలోనే ఫ్యూచర్ సిటీ కార్యకలాపాలు ఇక్కడి నుంచే సాగుతాయన్నారు.