Navjot Singh Sidhu Key Comments on Virat Kohli: క్రికెట్ ప్రపంచంలో విరాట్ కోహ్లీకి ఉన్న క్రేజ్ గురించి ప్రత్యేకంగా చెప్పనక్కర్లేదు. కేవలం అభిమానులే కాదు, మాజీ దిగ్గజాలు సైతం అతని ఆటతీరుకు ఫిదా అవుతుంటారు. తాజాగా టీమ్ ఇండియా మాజీ ఓపెనర్, తనదైన శైలిలో అలరించే నవజ్యోత్ సింగ్ సిద్ధూ, కోహ్లీపై ప్రశంసల వర్షం కురిపించారు. కోహ్లీని “24 క్యారెట్ల బంగారం” అని అభివర్ణించడమే కాకుండా, దేవుడు తనకు ఒక వరం ఇస్తే ఏం కోరుకుంటారో చెబుతూ సంచలన వ్యాఖ్యలు చేశాడు.
భారత క్రికెట్ చరిత్రలో అత్యంత ప్రభావవంతమైన ఆటగాళ్లలో విరాట్ కోహ్లీ ఒకడనే విషయం తెలిసిందే. అతని ఫిట్నెస్, పరుగుల దాహం, మైదానంలో చూపించే దూకుడు అతడిని మిగిలిన వారికంటే భిన్నంగా నిలబెడుతుంది. ఇదే విషయాన్ని నవజ్యోత్ సింగ్ సిద్ధూ ఒక ఇంటర్వ్యూలో నొక్కి చెప్పాడు.
దేవుడు వరం ఇస్తే అదే కోరుకుంటా: సిద్ధూ మాట్లాడుతూ.. “ఒకవేళ దేవుడు ప్రత్యక్షమై నన్ను ఒక వరం కోరుకోమంటే, నేను నా యవ్వనాన్ని లేదా నా సంపదను కోరుకోను. నేను మళ్ళీ పుట్టి విరాట్ కోహ్లీలా క్రికెట్ ఆడాలని కోరుకుంటాను. అతనిలో ఉన్న అంకితభావం, క్రమశిక్షణ అసాధారణం” అని వ్యాఖ్యానించాడు. కోహ్లీ ఆటను చూడటం ఒక అద్భుతమైన అనుభవమని ఆయన పేర్కొన్నాడు.
24 క్యారెట్ల బంగారం: కోహ్లీని సిద్ధూ కేవలం గొప్ప ఆటగాడిగానే కాకుండా ఒక స్వచ్ఛమైన వ్యక్తిగా అభివర్ణించాడు. “విరాట్ కోహ్లీ 24 క్యారెట్ల బంగారం లాంటివాడు. కాలం మారుతున్నా, తరాలు మారుతున్నా అతని విలువ తగ్గదు. అతను క్రీజులో ఉన్నాడంటే ప్రత్యర్థి జట్టులో భయం మొదలవుతుంది. తన బ్యాట్తో సమాధానం చెప్పడం కోహ్లీకి అలవాటు. అతను రికార్డుల కోసం ఆడడు, జట్టు విజయం కోసమే ఆడతాడు, కానీ ఆ క్రమంలో రికార్డులే అతడిని వెతుక్కుంటూ వస్తాయి” అని సిద్ధూ ప్రశంసించాడు.
కోహ్లీలోని ప్రత్యేకత: సిద్ధూ విశ్లేషణ ప్రకారం.. కోహ్లీ గొప్పతనం కేవలం అతని బ్యాటింగ్లోనే లేదు, అతని మానసిక దృఢత్వంలో ఉంది. క్లిష్ట పరిస్థితుల్లో కూడా ఒత్తిడిని దరిచేరనీయకుండా మ్యాచ్ను గెలిపించే సత్తా కోహ్లీ సొంతం. ముఖ్యంగా ఛేజింగ్ సమయంలో కోహ్లీ ప్రదర్శించే ఏకాగ్రతను చూసి ప్రతి యువ క్రికెటర్ నేర్చుకోవాలని సిద్ధూ సూచించాడు.
నవజ్యోత్ సింగ్ సిద్ధూ చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. “కింగ్ కోహ్లీ” పట్ల సిద్ధూకి ఉన్న గౌరవం చూసి అభిమానులు సంతోషం వ్యక్తం చేస్తున్నాడు. టెస్టులు, వన్డేలు లేదా టీ20లు.. ఫార్మాట్ ఏదైనా కోహ్లీ తనదైన ముద్ర వేస్తూనే ఉంటాడని సిద్ధూ విశ్వాసం వ్యక్తం చేశాడు.
మరిన్ని క్రీడా వార్తల కోసం ఇక్కడ క్లిక్ చేయండి..