లెబనాన్లో పెరుగుతున్న పౌరుల మృతులపై భారత్ తీవ్ర ఆందోళన వ్యక్తం చేసింది. ఇజ్రాయెల్ దాడులు తీవ్రతరం కావడంతో, ఇప్పటికే అనిశ్చితిలో ఉన్న అమెరికాఇరాన్ కాల్పుల విరమణ ఒప్పందంపై సందేహాలు నెలకొన్న నేపథ్యంలో న్యూఢిల్లీ ఈ ప్రకటన చేసింది. బుధవారం జరిగిన ఇజ్రాయెల్ వైమానిక దాడుల్లో కనీసం 300 మంది మరణించినట్లు లెబనాన్ అధికారులు వెల్లడించారు. ఈ పరిస్థితిపై స్పందించిన విదేశాంగ మంత్రిత్వ శాఖ ప్రతినిధి రణధీర్ జైస్వాల్, లెబనాన్లో భారీ సంఖ్యలో పౌరులు ప్రాణాలు కోల్పోతున్నారన్న సమాచారం మాకు తీవ్ర ఆందోళన కలిగిస్తోంది అని తెలిపారు. ఐక్యరాజ్యసమితి శాంతి బలగాలకు సైనికులను అందిస్తున్న దేశంగా భారత్, లెబనాన్ శాంతి, భద్రతల విషయంలో బాధ్యతతో వ్యవహరిస్తోందని ఆయన పేర్కొన్నారు. ప్రస్తుతం జరుగుతున్న పరిణామాలు ఆందోళనకరంగా ఉన్నాయి. పౌరుల రక్షణకు అత్యంత ప్రాధాన్యత ఇవ్వాలి. అంతర్జాతీయ చట్టాలను పాటించడం, దేశాల సార్వభౌమత్వం, భౌగోళిక సమగ్రతను గౌరవించడం అవసరం అని జైస్వాల్ అన్నారు.
గల్ఫ్ దేశాలతో భారత్ నిరంతరం సంప్రదింపులు కొనసాగిస్తున్నట్లు ఆయన తెలిపారు. ఈ నేపథ్యంలో పెట్రోలియం మంత్రి హర్దీప్ సింగ్ పూరి ఖతార్ పర్యటన కొనసాగుతోందని, విదేశాంగ మంత్రి ఎస్. జైశంకర్ త్వరలో యునైటెడ్ అరబ్ ఎమిరేట్స్ పర్యటనకు వెళ్లనున్నారని చెప్పారు. ఈ పర్యటనలో పశ్చిమ ఆసియా సంక్షోభంపై చర్చలు జరగనున్నాయి. ఇదిలా ఉండగా, అమెరికాఇరాన్ మధ్య రెండు వారాల కాలపరిమితి ఉన్న కాల్పుల విరమణ ఒప్పందాన్ని భారత్ స్వాగతించింది. హార్మూజ్ జలసంధిలో వాణిజ్య రవాణా నిర్బంధం లేకుండా కొనసాగాలని, పశ్చిమ ఆసియాలో స్థిరమైన శాంతి నెలకొనాలని ఆశాభావం వ్యక్తం చేసింది. లెబనాన్లో భద్రతా పరిస్థితి ఉద్రిక్తంగా ఉన్న నేపథ్యంలో, అక్కడి భారత రాయబార కార్యాలయం భారతీయుల భద్రతపై నిత్యం పర్యవేక్షణ కొనసాగిస్తున్నట్లు విదేశాంగ మంత్రిత్వ శాఖ వెల్లడించింది.