Shaheen Afridi Controversy: పాకిస్థాన్ సూపర్ లీగ్ పోటీలు జరుగుతున్న సమయంలో షాహీన్ అఫ్రిది వివాదాలకు కేంద్రబిందువుగా మారాడు. ఇటీవలే హోటల్ గదిలో ప్రవర్తన, బంతి రూపం మార్చిన వివాదాల్లో ఆయన పేరు వినిపించింది. అయితే, తాజాగా సామాజిక మాధ్యమాల్లో ఆయన పెట్టిన ఒక పోస్ట్ దేశవ్యాప్తంగా చర్చనీయాంశమైంది. అంతర్జాతీయ రాజకీయ వ్యవహారాల్లో తలదూర్చినందుకు ఆయనపై భారీ జరిమానా విధించాలని చాలామంది డిమాండ్ చేస్తున్నారు.
వివాదాస్పద పోస్ట్లో ఏముంది?
అమెరికా, ఇరాన్ దేశాల మధ్య యుద్ధ విరమణకు పాకిస్థాన్ ప్రధానమంత్రి షెహబాజ్ షరీఫ్, ఫీల్డ్ మార్షల్ ఆసిమ్ మునీర్ చేసిన కృషిని అఫ్రిది ప్రశంసించాడు. “శాంతి స్థాపనలో పాకిస్థాన్ పాత్ర గర్వకారణం, మానవత్వమే గెలిచింది” అంటూ ఆయన రాసుకొచ్చాడు. ఒక క్రీడాకారుడు అయి ఉండి, సున్నితమైన రాజకీయ, అంతర్జాతీయ అంశాలపై బహిరంగంగా స్పందించడం బోర్డు నిబంధనలకు విరుద్ధమని విమర్శలు వస్తున్నాయి.
నసీమ్ షా ఉదంతంతో పోలిక..
Will Shaheen Afridi be fined and dropped out for making a political tweet like Naseem Shah was?
— Mooman (@MoomanMuhammad) April 8, 2026
గతంలో పాకిస్థాన్ క్రికెటర్ నసీమ్ షా కూడా ఇలాంటి తప్పిదమే చేసి రెండు కోట్ల పాకిస్థానీ రూపాయల జరిమానా చెల్లించాడు. పంజాబ్ ముఖ్యమంత్రి, నవాజ్పై విమర్శలు చేసినందుకు బోర్డు ఆయనపై కఠిన చర్యలు తీసుకుంది. రాజకీయ విషయాల్లో జోక్యం చేసుకుంటే క్రీడాకారుల క్రమశిక్షణ దెబ్బతింటుందని బోర్డు భావిస్తుంది. ఇప్పుడు షాహీన్ కూడా అదే బాటలో పయనిస్తుండటంతో, ఆయనకు కూడా భారీ జరిమానా విధిస్తారా అన్నది ఆసక్తికరంగా మారింది.
జరిమానా భయం.. అభిమానుల ఆగ్రహం..
క్రికెట్ ఆటపై దృష్టి పెట్టకుండా రాజకీయ ప్రచారాల్లో పాల్గొనడం వల్ల జట్టు ప్రదర్శన దెబ్బతింటుందని అభిమానులు సోషల్ మీడియాలో ఆగ్రహం వ్యక్తం చేస్తున్నారు. నిబంధనల ప్రకారం క్రీడాకారులు రాజకీయ ప్రకటనలు చేయకూడదు. అఫ్రిది చేసిన ఈ పనికి బోర్డు కనుక సీరియస్ అయితే, సుమారు రెండు కోట్ల రూపాయల వరకు జరిమానా పడే అవకాశం ఉందని విశ్లేషకులు అంచనా వేస్తున్నారు. మరి ఈ వివాదంపై పాకిస్థాన్ క్రికెట్ బోర్డు ఎలా స్పందిస్తుందో వేచి చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..