హైదరాబాద్లోని ప్రసాద్ ల్యాబ్లో సింగర్, నటి దియా అందించిన ‘అరెరే.. అరెరే’ మ్యూజిక్ వీడియో ఆల్బమ్ను ఘనంగా విడుదల చేశారు. బటర్ఫ్లై మ్యూజిక్ బ్యానర్పై రూపొందిన ఈ వీడియో విడుదల వేడుక సినీ ప్రముఖుల సందడితో అట్టహాసంగా జరిగింది. ఈ కార్యక్రమానికి తెలుగు ఫిల్మ్ డైరెక్టర్స్ అసోసియేషన్ అధ్యక్షుడు వి.ఎన్. ఆదిత్య, హీరో పూరి ఆకాష్ సహా సినీ ప్రముఖులు సమీర్, సాగర్, ప్రముఖ సంగీత దర్శకుడు రఘు కుంచె, నటుడు ఆర్టిస్ట్ శివారెడ్డి ముఖ్య అతిథులుగా హాజరయ్యారు. అందరూ మ్యూజిక్ వీడియోను విడుదల చేసి చిత్రబృందానికి అభినందనలు తెలిపారు. కొత్త ప్రతిభను ప్రోత్సహించడం ఎంతో అవసరమని ఈ సందర్భంగా అభిప్రాయపడ్డారు.
సింగర్ దియా మాట్లాడుతూ… ఈ ఆల్బమ్ రూపుదిద్దుకోవడంలో సహకరించిన ప్రతి ఒక్కరికీ కృతజ్ఞతలు తెలియజేశారు. తనపై నమ్మకం ఉంచి ప్రాజెక్ట్ను విజయవంతం చేసిన టీమ్కు ప్రత్యేక ధన్యవాదాలు చెప్పారు. కార్యక్రమానికి హాజరై ఆశీర్వదించిన అతిథులందరికీ రుణపడి ఉంటానని, ప్రేక్షకుల ప్రేమే తనకు ప్రధాన బలం అని పేర్కొన్నారు. హీరో పూరి ఆకాష్ మాట్లాడుతూ.. దియాతో ‘మహబూబ’ సినిమాలో కలిసి పనిచేసిన అనుభవాన్ని గుర్తుచేసుకున్నారు. ఈ పాటలో ఆమె కేవలం నటించిందని అనుకున్నానని, కానీ స్వయంగా పాడిందని తెలుసుకుని ఆశ్చర్యపోయానని అన్నారు. దియా చాలా ప్రతిభావంతురాలని, ఇలాంటి యువ టాలెంట్ను అందరూ ప్రోత్సహించాలని కోరారు. ఈ ఆల్బమ్ ప్రేక్షకులను ఆకట్టుకుంటుందని చిత్రబృందం నమ్మకాన్ని వ్యక్తం చేసింది.