మెగా ప్రిన్స్ వరుణ్ తేజ్ తొలిసారిగా పూర్తి స్థాయి కామెడీ-హారర్ జానర్లో నటించిన మూవీ ‘కొరియన్ కనకరాజు’ (Korean Kanakaraju). మేర్లపాక గాంధీ దర్శకత్వంలో తెరకెక్కిన ఈ చిత్రంలో రితిక నాయక్ హీరోయిన్గా నటించగా, సత్య కీలక పాత్ర పోషించారు. ట్రైలర్తోనే అంచనాలు పెంచుకున్న ఈ సినిమా, ఒకే శరీరంలో రెండు ఆత్మల కాన్సెప్ట్తో ప్రేక్షకుల ముందుకు వచ్చింది. ఇవాళ శుక్రవారం (ఆగస్టు 7 2026న) థియేటర్లలో విడుదలైన ఈ చిత్రం ప్రేక్షకులను ఎంతవరకు ఆకట్టుకుంది? వరుణ్ తేజ్కు కంబ్యాక్ ఇచ్చిందా? లేదా? అనేది రివ్యూలో తెలుసుకుందాం.
కథేంటంటే:
రాయలసీమ నేపథ్యం ఉన్న కనకరాజు (వరుణ్ తేజ్) జీవితంలో అనుకోకుండా చోటుచేసుకునే కొన్ని విచిత్రమైన ఘటనలు, ఫాంటసీ మరియు హారర్ అంశాల చుట్టూ ఈ కథ తిరుగుతుంది. ఒకే శరీరంలో రెండు వేర్వేరు ఆత్మలు ప్రవేశించినప్పుడు చోటుచేసుకునే పరిణామాలు, కొరియన్ కల్చర్ – ఇండియన్ కల్చర్ కాంబినేషన్లో వచ్చే డ్రామా ఈ చిత్రానికి ప్రధాన కథాంశం.
పూర్తి కథలోకి వెళితే..
రాయలసీమలోని పెనుగొండ ప్రాంతానికి చెందిన కనకరాజు (వరుణ్ తేజ్) కోపం ఎక్కువగా ఉండే సాధారణ యువకుడు. ఒక రోజు కొరియా నుంచి భారత్కు వచ్చిన డ్రాగన్ ఆకారంలోని పురాతన పాత్ర (vessel) అతని జీవితాన్ని పూర్తిగా మార్చేస్తుంది. ఆ పాత్రలో బంధించబడి ఉన్న ఓ కొరియన్ ఆత్మ కనకరాజు శరీరంలోకి ప్రవేశిస్తుంది. దీంతో ఒకే శరీరంలో కనకరాజు మరియు కొరియన్ ఆత్మ కలిసి ఉండాల్సిన పరిస్థితి వస్తుంది. వారి మధ్య జరిగే ఘర్షణలు, కామెడీ సన్నివేశాలే సినిమా ప్రధాన ఆకర్షణ.
ఆ ఆత్మ ప్రభావంతో కనకరాజుకు అసాధారణ శక్తులు వస్తాయి. అతని కళ్ల రంగు మారుతుంది. కొరియా గురించి ప్రస్తావన వచ్చినప్పుడల్లా అతనికి విచిత్రమైన అనుభవాలు ఎదురవుతాయి. కథ ముందుకు సాగేకొద్దీ ఆ కొరియన్ ఆత్మకు కొరియన్ మాఫియాతో ఉన్న గత సంబంధం బయటపడుతుంది. ఆ మాఫియా మళ్లీ ఆ ఆత్మను వెతుకుతూ రావడంతో, కనకరాజు అనుకోకుండా అంతర్జాతీయ స్థాయి సంఘర్షణలో చిక్కుకుంటాడు. చివరికి కనకరాజు ఆ ఆత్మకు విముక్తి కల్పించాడా? కొరియన్ మాఫియాను ఎలా ఎదుర్కొన్నాడు? తన జీవితాన్ని తిరిగి సాధారణ స్థితికి తీసుకువచ్చాడా? లేదా అనేది మిగతా కథ.
ఎలా ఉందంటే?
రాయలసీమ నేపథ్యంలో కొరియన్ కల్చర్ను మేళవిస్తూ రూపొందించిన ఈ చిత్రం కథాంశంతోనే ప్రత్యేక ఆకర్షణగా నిలుస్తుంది. పెనుగొండకు చెందిన ఓ సాధారణ యువకుడి జీవితంలోకి పురాతన డ్రాగన్ వెసెల్ (Vessel) ద్వారా కొరియన్ ఆత్మ ప్రవేశించడం, ఆ తర్వాత అతని జీవితంలో చోటుచేసుకునే అనూహ్య పరిణామాలు కథకు కొత్తదనాన్ని తీసుకొచ్చాయి.
ఒకే శరీరంలో రెండు భిన్నమైన ఆత్మలు నివసించే ‘డ్యుయల్ సోల్’ కాన్సెప్ట్ సినిమాకు ప్రధాన బలంగా నిలిచింది. కోపిష్టి రాయలసీమ యువకుడు, మరోవైపు కొరియన్ ఆత్మ మధ్య జరిగే అంతర్గత సంఘర్షణలు, వాటి వల్ల వచ్చే హాస్యభరితమైన మరియు ఉత్కంఠభరితమైన పరిస్థితులు ప్రేక్షకులకు కొత్త అనుభూతిని అందిస్తాయి. ఫాంటసీ, హారర్, కామెడీ అంశాలను దర్శకుడు ఆసక్తికరంగా మిళితం చేశారు.
నటీనటుల పెర్ఫార్మన్స్..
వరుణ్ తేజ్ తన పాత్రలో పూర్తి స్థాయిలో ఒదిగిపోయారు. రాయలసీమ యాస, బాడీ లాంగ్వేజ్తో ఆకట్టుకోవడంతో పాటు, కొరియన్ ఆత్మ ప్రభావానికి లోనైనప్పుడు చూపించిన హావభావాలు, కళ్ల రంగు మారే సన్నివేశాల్లో ఆయన నటన ప్రత్యేకంగా నిలిచింది. రితిక నాయక్ తన పాత్ర పరిధి మేరకు ఆకట్టుకుంది. కామెడీ టైమింగ్తోనూ ప్రేక్షకులను మెప్పించారు. ఇక కమెడియన్ సత్య మరోసారి తన మార్క్ కామెడీతో సినిమాకు ప్రధాన బలంగా నిలిచారు. వరుణ్ తేజ్–సత్య కాంబినేషన్లో వచ్చే సన్నివేశాలు థియేటర్లలో నవ్వుల పూవులు పూయించేలా ఉండి, వినోదాన్ని మరింత పెంచాయి.
టెక్నీకల్ అంశాలు..
డైరెక్టర్ మేర్లపాక గాంధీ.. హారర్ మరియు కామెడీ జోనర్స్ను సమన్వయం చేయడంలో తన అనుభవాన్ని చాటుకున్నారు. ముఖ్యంగా సెకండ్ హాఫ్లో వచ్చే కొరియన్ మాఫియా ఎపిసోడ్, అంతర్జాతీయ స్థాయి సంఘర్షణను కామెడీతో మిళితం చేసిన విధానం ఆకట్టుకుంటుంది. హారర్ మరియు ఫాంటసీ అంశాలు ఉన్నందున కెమెరా వర్క్, బ్యాక్గ్రౌండ్ మ్యూజిక్ సినిమా మూడ్ను ఎలివేట్ చేయడంలో విజయవంతమయ్యాయి. కొరియాకు సంబంధించిన విజువల్స్, పురాతన పాత్ర చుట్టూ తిరిగే సన్నివేశాలు కథకు రిచ్ లుక్ని తెచ్చాయి. మొత్తానికి దర్శకుడు మేర్లపాక గాంధీకి ఫన్-ఫిల్డ్ ఎంటర్టైనర్లను తెరకెక్కించడంలో ఇప్పటికే మంచి ట్రాక్ రికార్డ్ ఉంది. ‘వెంకటాద్రి ఎక్స్ప్రెస్’, ‘ఎక్స్ప్రెస్ రాజా’, ‘ఏక్ మినీ కథ’ వంటి విజయవంతమైన చిత్రాలు అందుకు నిదర్శనం. ఇప్పుడు ‘కొరియన్ కనకరాజ్’లో కామెడీకి హర్రర్ అంశాలను జోడించి మరోసారి ప్రేక్షకులను అలరించే ప్రయత్నం చేయడంలో సక్సెస్ అయ్యారు.