Ramayana vs Godzilla: 2026 దీపావళికి అరుదైన బాక్సాఫీస్ పోరుకు వేదిక కానుంది. ప్రపంచవ్యాప్తంగా అత్యంత ఆసక్తిగా ఎదురుచూస్తున్న రెండు భారీ సినిమాలు ఒకే రోజు ప్రేక్షకుల ముందుకు రానుండటంతో ఈ గ్లోబల్ క్లాష్ తప్పేలా లేదు. ఒకవైపు భారతీయ ఇతిహాసం ఆధారంగా తెరకెక్కిన ‘రామాయణం’, మరోవైపు జపాన్ దిగ్గజ రాక్షస ఫ్రాంచైజీ ‘గాడ్జిల్లా మైనస్ జీరో’ నవంబర్ 6న ప్రపంచవ్యాప్తంగా విడుదల కానున్నాయి. ఈ రెండు సినిమాల మధ్య జరిగే పోటీ ఇప్పుడు గ్లోబల్ లెవెల్ లో హాట్ టాపిక్గా మారింది. దర్శకుడు నితేష్ తివారీ తెరకెక్కిస్తున్న ‘రామాయణం’లో శ్రీరాముడిగా రణబీర్ కపూర్, సీతగా సాయి పల్లవి, రావణుడిగా యశ్ నటిస్తున్నారు. తాజాగా విడుదలైన ట్రైలర్తో పాటు, నవంబర్ 6న రిలీజ్ డేట్ ను చిత్రబృందం ఆఫీషియల్ గా అనౌన్స్ చేసింది. ఈ సినిమాకు దీపావళి సెలవుల సీజన్ను పూర్తిగా ఉపయోగించుకునేలా ప్లాన్ చేశారు మేకర్స్. వారాంతంతో పాటు గోవర్ధన పూజ, భాయ్ దూజ్ వంటి పండుగల సెలవులు కూడా ఉండటంతో మొదటి వారంలోనే భారీ వసూళ్లు సాధించే అవకాశాలు కనిపిస్తున్నాయి.
ఇండియన్ హిస్టరీలోనే అతిపెద్ద థియేట్రికల్ విడుదలల్లో ఒకటిగా నిలవనున్న ‘రామాయణం’ కు దేశీయ మార్కెట్లో భారీ ఆధిక్యం ఉండే అవకాశం ఉన్నప్పటికీ, విదేశీ మార్కెట్లో మాత్రం గట్టి పోటీ ఎదురుకానుంది. అదే రోజు దర్శకుడు తకాషి యమజాకి తెరకెక్కించిన ‘గాడ్జిల్లా మైనస్ జీరో’ మూవీ కూడా ప్రపంచవ్యాప్తంగా విడుదల కానుంది. గతంలో వచ్చిన ‘గాడ్జిల్లా మైనస్ జీరో’ కేవలం 10 మిలియన్ డాలర్ల అంచనా బడ్జెట్తో రూపొంది ప్రపంచవ్యాప్తంగా 110 మిలియన్ డాలర్లకు పైగా వసూళ్లు సాధించింది. అంతేకాదు, బెస్ట్ విజువల్ ఎఫెక్ట్స్ విభాగంలో అకాడమీ అవార్డు అందుకున్న తొలి ఆంగ్లేతర భాషా చిత్రంగా చరిత్ర సృష్టించింది. దీంతో ఈ కొత్త మూవీపై కూడా గ్లోబల్ గా భారీ బజ్ ఏర్పడింది.
ఇక ఈ రెండు సినిమాలు ఒకే రోజు రిలీజ్ కావడంతో ఐమాక్స్, ఇతర ప్రీమియం లార్జ్ ఫార్మాట్ స్క్రీన్ల కోసం కూడా తీవ్ర పోటీ నెలకొనే అవకాశం ఉంది. ఇటీవల ‘స్పైడర్-మ్యాన్: బ్రాండ్ న్యూ డే’ ఐమాక్స్ స్క్రీన్ల పరిమితి ఉన్నప్పటికీ ప్రపంచవ్యాప్తంగా బిలియన్ డాలర్ల క్లబ్లో చేరింది. అయితే ‘రామాయణం’ ఈ క్లాష్ ను తట్టుకుని నిలబడే అవకాశాలు పుష్కలంగా ఉన్నాయని ట్రేడ్ వర్గాలు భావిస్తున్నాయి. భారతీయులు ఈ మూవీని ఆదరిస్తారనే ధీమాతో ఉన్నారు మేకర్స్. ఒకవైపు భారతీయ ఆధ్యాత్మిక ఇతిహాసం, మరోవైపు ప్రపంచవ్యాప్తంగా గుర్తింపు పొందిన కైజూ ఫ్రాంచైజీ మధ్య జరుగనున్న ఈ పోరు బాక్సాఫీస్ క్లాష్ మాత్రమే కాదు. రెండు విభిన్న సంస్కృతులు, రెండు భారీ విజువల్ స్పెక్టాకిల్స్, రెండు గ్లోబల్ మార్కెట్ల మధ్య జరిగే ఆసక్తికరమైన పోటీగా నిలవనుంది. దీపావళి 2026లో ప్రేక్షకులు శ్రీరాముడి గాథను ఎంచుకుంటారా, లేక గాడ్జిల్లా విధ్వంసాన్ని ఆస్వాదిస్తారా అనేది తెలవాలంటే రిలీజ్ వరకు వేచి చూడాల్సిందే.