Raaka: ఐకాన్ స్టార్ అల్లు అర్జున్, దర్శకుడు అట్లీ కాంబినేషన్లో తెరకెక్కుతున్న భారీ పాన్ ఇండియా మూవీ ‘రాకా’ ప్రస్తుతం అత్యంత ఆసక్తిగా ఎదురుచూస్తున్న ప్రాజెక్టులలో ఒకటిగా నిలిచింది. భారీ బడ్జెట్, అంతర్జాతీయ స్థాయి విజువల్స్, స్టార్ కాస్టింగ్తో రూపొందుతున్న ఈ మూవీకి సంబంధించిన ప్రతి అప్డేట్ సోషల్ మీడియాలో వైరల్ అవుతోంది. అలాంటి సమయంలో బాలీవుడ్ సూపర్ స్టార్ షారుఖ్ ఖాన్ ఈ సినిమాలో అతిథి పాత్రలో కనిపించనున్నారనే వార్త అభిమానుల్లో భారీ ఆసక్తిని రేకెత్తించింది. అయితే తాజా సమాచారం ప్రకారం, ఈ ప్రచారంలో ఎలాంటి నిజం లేదని సినీ వర్గాలు స్పష్టం చేస్తున్నాయి.
గత కొద్ది రోజులుగా ‘రాకా’లో షారుఖ్ ఖాన్ కోసం ప్రత్యేక పాత్ర రాశారని, ఆ పాత్రకు సంబంధించిన సన్నివేశాలను విదేశాల్లో చిత్రీకరించనున్నారని సోషల్ మీడియాలో విస్తృతంగా ప్రచారం జరిగింది. అట్లీ, షారుఖ్ కలిసి రూపొందించిన ‘జవాన్’ బ్లాక్బస్టర్ విజయం తర్వాత ఇద్దరి మధ్య ఉన్న సన్నిహిత అనుబంధం కారణంగానే ఈ ఊహాగానాలు మరింత బలపడ్డాయి. అయితే చిత్రబృందం ఇప్పటివరకు అలాంటి పాత్రపై ఎలాంటి ప్రకటన చేయలేదు. ప్రస్తుతం అందుబాటులో ఉన్న సమాచారం ప్రకారం, షారుఖ్ గెస్ట్ రోల్ వార్తలు కేవలం సోషల్ మీడియా ప్రచారానికే పరిమితమయ్యాయి.
మరోవైపు ‘రాకా’ షూటింగ్ కూడా వేగంగా కొనసాగుతోంది. గత ఏడాది ముంబైలో ప్రారంభమైన ఈ భారీ యాక్షన్ ఎంటర్టైనర్ ఇప్పటివరకు పెద్దగా ఎలాంటి విరామం లేకుండా షూటింగ్ జరుపుకుంటుండటం విశేషం. ఈ సినిమాకు సంబంధించిన విజువల్ ఎఫెక్ట్స్ ను ప్రముఖ హాలీవుడ్ వీఎఫ్ఎక్స్ సంస్థ నిర్వహిస్తోంది. మొదట దుబాయ్తో పాటు మరికొన్ని అంతర్జాతీయ ప్రాంతాల్లో షూటింగ్ నిర్వహించాలని భావించినప్పటికీ, ఇరాన్ ప్రాంతంలో నెలకొన్న ఉద్రిక్త పరిస్థితుల కారణంగా ఆ షెడ్యూళ్లను రద్దు చేసి, మొత్తం షూటింగ్ ను ముంబైలో ఏర్పాటు చేసిన ప్రత్యేక సెట్పైనే కొనసాగిస్తున్నారు. ప్రస్తుతం అల్లు అర్జున్ చిన్నపాటి విరామాలు తప్ప దాదాపు నిరంతరాయంగా ఈ సినిమా షూటింగ్లో పాల్గొంటున్నారు. కథానాయిక దీపికా పదుకొణే కూడా తన పాత్రకు సంబంధించిన షూటింగ్ ను దాదాపు పూర్తి చేసినట్లు సమాచారం.
సన్ పిక్చర్స్ అత్యంత భారీ స్థాయిలో నిర్మిస్తున్న ఈ చిత్రాన్ని రెండు భాగాలుగా విడుదల చేయాలనే ప్రణాళికతో అట్లీ ముందుకు సాగుతున్నారు. యంగ్ మ్యూజిక్ సెన్సేషన్ సాయి అభ్యంకర్ సంగీతం అందిస్తుండగా, రష్మిక మందన్న, మృణాల్ ఠాకూర్ పేర్లు కూడా వినిపిస్తున్నప్పటికీ వాటిపై ఇంకా అధికారిక ప్రకటన లేదు. ముంబైలో కొనసాగుతున్న ఈ భారీ షెడ్యూల్ మరో నాలుగు నెలల పాటు సాగనుండగా, 2027లో ఈ చిత్రాన్ని ప్రపంచవ్యాప్తంగా గ్రాండ్గా విడుదల చేయడానికి మేకర్స్ సన్నాహాలు చేస్తున్నారు. ప్రస్తుతం ‘రాకా’పై వస్తున్న షారుఖ్ గెస్ట్ రోల్ వార్తలను మాత్రం అధికారిక ప్రకటన వచ్చే వరకు పుకార్లుగానే పరిగణించాల్సి ఉంటుంది.