అమెరికా అధ్యక్షుడు డొనాల్డ్ ట్రంప్ గోల్ఫ్ కోర్స్ సమీపంలో ఆయుధాలు, మందుగుండు సామగ్రితో ఉన్న 38 ఏళ్ల వ్యక్తిని పోలీసులు అరెస్ట్ చేశారు. ట్రంప్ హాజరుకానున్న ఓ నిధుల సేకరణ కార్యక్రమానికి రెండు రోజుల ముందు ఈ ఘటన చోటుచేసుకోవడం కలకలం రేపింది. లాస్ ఏంజెల్స్ కౌంటీ షెరీఫ్ విభాగం వివరాల ప్రకారం, అనుమానితుడిని జీనైన్ జాన్ టేలే (Jeanine John Taele)గా గుర్తించారు. అతడు రాంచో పాలొస్ వెర్డెస్లోని ట్రంప్ నేషనల్ గోల్ఫ్ కోర్స్ సమీపంలో భద్రతా ఏర్పాట్లను గమనిస్తూ ఫొటోలు, వీడియోలు తీస్తున్నట్లు అధికారులు తెలిపారు.
16 రౌండ్ల మ్యాగజైన్.. కారులో లోడెడ్ పిస్టల్
అధికారుల ప్రకారం, టేలే వద్ద 16 రౌండ్ల సామర్థ్యం ఉన్న మ్యాగజైన్లో మందుగుండు సామగ్రి లభించింది. అతని వాహనంలో లోడెడ్ హ్యాండ్గన్ను కూడా పోలీసులు స్వాధీనం చేసుకున్నారు. అనంతరం సమీపంలోని డౌనీ ప్రాంతంలో ఉన్న అతని నివాసంలో పోలీసులు సోదాలు నిర్వహించారు. ఈ సోదాల్లో పలు తుపాకులు, మందుగుండు సామగ్రి, మ్యాగజైన్లు, బాడీ ఆర్మర్తో పాటు అధికారులు “ఆందోళన కలిగించే వ్యాఖ్యలు” ఉన్న నోట్బుక్లను గుర్తించినట్లు తెలిపారు.
పలు కేసులు నమోదు
ఈ ఘటనకు సంబంధించి టేలేపై పలు ఫెలోనీ కేసులు నమోదు చేశారు. వీటిలో సెకండ్-డిగ్రీ రాబరీ, పెద్ద సామర్థ్యం కలిగిన మ్యాగజైన్ను కలిగి ఉండటం, షార్ట్-బ్యారెల్ రైఫిల్ లేదా షాట్గన్ను కలిగి ఉండటం వంటి అభియోగాలు ఉన్నాయి. అదనంగా, వాహనంలో దాచిన ఆయుధాన్ని కలిగి ఉన్నందుకు మిస్డిమీనర్ అభియోగం కూడా నమోదైంది. టేలే సోమవారం కోర్టులో హాజరై తనపై ఉన్న అన్ని అభియోగాలను అంగీకరించకుండా నాట్ గిల్టీగా వాదించాడు. కోర్టు అతడు ఎలాంటి ఆయుధాలను కలిగి ఉండకూడదని, ట్రంప్ గోల్ఫ్ కోర్స్కు దూరంగా ఉండాలని ఆదేశించింది. అతని బెయిల్ మొత్తాన్ని 2.5 లక్షల అమెరికన్ డాలర్లుగా నిర్ణయించింది.
ఇప్పటికే మరో కేసులో పోలీసుల దర్యాప్తులో..
అధికారుల ప్రకారం, టేలేను పోలీసులు ఎదుర్కొనే సమయానికి అతడు ఇప్పటికే ఓ దోపిడీ కేసుకు సంబంధించి ఎల్ సెగుండో పోలీస్ డిపార్ట్మెంట్ దర్యాప్తులో ఉన్నాడు. ఆదివారం పోలీసులు అతడిని గుర్తించిన తర్వాత విచారణ చేపట్టి ఆయుధాలను స్వాధీనం చేసుకున్నట్లు అధికారులు తెలిపారు.
ప్రజలకు ముప్పు లేదన్న పోలీసులు
టేలే అరెస్టు అనంతరం ప్రస్తుతం తమ పరిధిలోని ప్రజలకు “విశ్వసనీయమైన ముప్పు లేదు” అని లాస్ ఏంజెలెస్ కౌంటీ షెరీఫ్ విభాగం ప్రకటించింది. అయితే ట్రంప్ భద్రత విషయంలో ఈ ఘటన ప్రాధాన్యత సంతరించుకుంది. ముఖ్యంగా 2024 అధ్యక్ష ఎన్నికల ప్రచార సమయంలో ట్రంప్పై రెండు హత్యాయత్నాలు జరిగిన నేపథ్యంలో ఆయన భద్రతపై ఇప్పటికే కట్టుదిట్టమైన చర్యలు కొనసాగుతున్నాయి.
2025లోనూ ట్రంప్ గోల్ఫ్ కోర్స్ వద్ద హత్యాయత్నం కేసు
2025లో ఫ్లోరిడాలోని ట్రంప్ గోల్ఫ్ కోర్స్ వద్ద ఆయనను హత్య చేసేందుకు ప్రయత్నించిన కేసులో ఓ వ్యక్తిని జ్యూరీ దోషిగా నిర్ధారించింది. తాజాగా కాలిఫోర్నియాలో ట్రంప్ గోల్ఫ్ కోర్స్ సమీపంలో ఆయుధాలతో వ్యక్తి అరెస్టు కావడంతో మరో హత్యాయత్నం కుట్రపై చర్చ మొదలైంది. అయితే ప్రస్తుత ఘటనలో ట్రంప్ను లక్ష్యంగా చేసుకుని హత్యాయత్నం చేసేందుకు స్పష్టమైన ప్రణాళిక ఉన్నట్లు అధికారులు నిర్ధారించలేదు. దర్యాప్తు కొనసాగుతున్నందున అరెస్టయిన వ్యక్తిపై ఉన్న ఆరోపణలు కోర్టులో నిరూపించాల్సి ఉంటుంది.