టీ20 క్రికెట్ చరిత్రలోనే అత్యంత అరుదైన ఘనత సాధించిన ఇంగ్లాండ్ డాషింగ్ బ్యాటర్ జోస్ బట్లర్.. ప్రపంచ క్రికెట్ను షాక్కు గురిచేశాడు. వెస్టిండీస్ దిగ్గజాలు కీరన్ పొలార్డ్, క్రిస్ గేల్లను వెనక్కి నెట్టి పొట్టి ఫార్మాట్లో అత్యధిక పరుగులు చేసిన బ్యాటర్గా అగ్రపీఠం ఎక్కాడు. భవిష్యత్తులో ఈ ఆల్ టైమ్ వరల్డ్ రికార్డును తిరగరాసేది ఒక భారతీయుడేనంటూ చేసిన వ్యాఖ్యలు తీవ్ర దుమారం రేపుతున్నాయి.
గేల్, పొలార్డ్ రికార్డులు గాలిలోకి.. బట్లర్ ఊచకోత..: ది హండ్రెడ్ లీగ్లో మాంచెస్టర్ సూపర్ జెయింట్స్ తరపున బరిలోకి దిగిన బట్లర్, వేల్ష్ ఫైర్ జట్టుపై ఊచకోత కోశాడు. కేవలం 20 బంతుల్లోనే 2 సిక్సర్లు, 6 ఫోర్లతో 51 పరుగులు చేసి నాటౌట్గా నిలిచాడు. ఈ మెరుపు ఇన్నింగ్స్తో టీ20ల్లో తన మొత్తం పరుగుల సంఖ్యను 14,833కు చేర్చాడు.
ఇప్పటివరకు 14,803 పరుగులతో అగ్రస్థానంలో ఉన్న కీరన్ పొలార్డ్ను వెనక్కి నెట్టేశాడు. సుదీర్ఘ కాలం పాటు ఈ సింహాసనాన్ని ఏలిన యూనివర్స్ బాస్ క్రిస్ గేల్ (14,562 పరుగులు) రికార్డును సైతం బట్లర్ అధిగమించడం విశేషం. 522 మ్యాచ్ల్లోనే 9 సెంచరీలు, 105 హాఫ్ సెంచరీలతో ఈ అరుదైన ఘనతను తన ఖాతాలో వేసుకున్నాడు.
భారత్ నుంచి ఆ కుర్రాడే నా రికార్డు బద్దలు కొడతాడు..: రికార్డు సాధించిన అనంతరం బట్లర్ మాట్లాడిన మాటలు ఇప్పుడు సోషల్ మీడియాను ఊపేస్తున్నాయి. ప్రపంచంలోనే అత్యధిక టీ20 పరుగులు చేసిన బ్యాటర్గా నిలవడం చాలా గర్వంగా ఉందన్న బట్లర్.. “ఈ రికార్డును ఎవరైనా ఒకరు భవిష్యత్తులో ఖచ్చితంగా దాటుతారు. నా అంచనా ప్రకారం ఆ పని చేసేది భారత్కు చెందిన వైభవ్ సూర్యవంశీ అయి ఉంటాడు” అంటూ సంచలన వ్యాఖ్యలు చేశాడు.
చిన్న వయసులోనే అసాధారణ ప్రతిభ కనబరుస్తున్న భారత యంగ్ సెన్సేషన్ వైభవ్ సూర్యవంశీపై బట్లర్ చూపించిన విశ్వాసం క్రికెట్ వర్గాలను ఆశ్చర్యపరిచింది. ప్రపంచ దిగ్గజాలను దాటేసిన వేళ.. ఒక భారతీయ కుర్రాడి పేరును ప్రత్యేకంగా ప్రస్తావించడం అందరి దృష్టినీ ఆకర్షించింది.
పాతాళం నుంచి శిఖరానికి.. మైండ్ గేమ్తో రీఎంట్రీ..: కొద్ది నెలల కిందటి వరకు తీవ్రమైన ఫామ్ లేమితో సతమతమైన బట్లర్.. తిరిగి పుంజుకున్న తీరు అద్భుతం. “క్రికెట్లో రోజులు ఎంత వేగంగా మారతాయో ఊహించలేం. కొద్దిరోజుల క్రితం వరకు పరుగులు తీయడానికి నానా తంటాలు పడ్డాను. ఇప్పుడు మళ్లీ నా కెరీర్లోనే అత్యుత్తమ ఫామ్లో ఉన్నట్లు అనిపిస్తోంది” అని బట్లర్ వ్యాఖ్యానించాడు. ఆటలో వెనకబడినప్పుడు లొంగిపోవడం లేదా తిరిగి పుంజుకోవడానికి శ్రమించడం.. ఈ రెండే దారులు ఉంటాయని స్పష్టం చేశాడు. తాను రెండో దారినే ఎంచుకుని పట్టుదలతో శ్రమించి ఈ స్థాయికి వచ్చానని చెప్పుకొచ్చాడు.
మాంచెస్టర్ ధనాధన్ విజయం..: మ్యాచ్ విషయానికొస్తే.. వేల్ష్ ఫైర్ నిర్దేశించిన 156 పరుగుల లక్ష్యాన్ని మాంచెస్టర్ సూపర్ జెయింట్స్ చాలా తేలికగా ఊదేసింది. టాస్ ఓడి మొదట బ్యాటింగ్ చేసిన వేల్ష్ ఫైర్ నిర్ణీత 100 బంతుల్లో 4 వికెట్ల నష్టానికి 155 పరుగులు చేసింది. మ్యాట్ షార్ట్ (71), ఫిల్ సాల్ట్ (48) రాణించారు. చేజింగ్లో మాంచెస్టర్ బ్యాటర్లు విరుచుకుపడ్డారు. టిమ్ సైఫెర్ట్ (62 నాటౌట్), పాల్ వాల్టర్ (37) బౌండరీల వర్షం కురిపించగా.. బట్లర్ విధ్వంసకర ఇన్నింగ్స్తో మరో 9 వికెట్లు మిగిలి ఉండగానే జట్టును విజయతీరాలకు చేర్చాడు.