Ajit Agarkar: టీమిండియా సీనియర్ ఫాస్ట్ బౌలర్ మహ్మద్ షమీకి మరోసారి నిరాశ ఎదురైంది. గాయంతో శ్రీలంకతో జరిగే రెండు టెస్టుల సిరీస్కు దూరమైన జస్ప్రీత్ బుమ్రా స్థానంలో అనుభవజ్ఞుడైన షమీని కాకుండా జమ్మూ కశ్మీర్ యువ పేసర్ అకీబ్ నబీని ఎంపిక చేస్తూ బీసీసీఐ సెలెక్షన్ కమిటీ కీలక నిర్ణయం తీసుకుంది. ఈ నిర్ణయం ద్వారా చీఫ్ సెలెక్టర్ అజిత్ అగార్కర్ షమీకి స్పష్టమైన సందేశం ఇచ్చినట్లుగా క్రికెట్ వర్గాలు భావిస్తున్నాయి. మహ్మద్ షమీ చివరిసారిగా 2025లో ఇంగ్లండ్తో జరిగిన టీ20 మ్యాచ్లో భారత జట్టుకు ప్రాతినిధ్యం వహించాడు. టెస్టు క్రికెట్లో అయితే 2023 తర్వాత ఆయనకు అవకాశం రాలేదు. గత ఏడాది న్యూజిలాండ్తో జరిగిన వన్డే సిరీస్లోనే చివరిసారిగా భారత జెర్సీ ధరించాడు.
షమీని తొలుత గాయాలు ఇబ్బంది పెట్టినా, గత ఏడాది కాలంగా దేశవాళీ క్రికెట్లో అద్భుత ప్రదర్శన చేసినప్పటికీ జాతీయ జట్టులోకి తిరిగి రాలేకపోయాడు. ఇటీవల ఏడు రంజీ ట్రోఫీ మ్యాచ్ల్లో 1,383 బంతులు వేసి 37 వికెట్లు పడగొట్టాడు. 16.72 సగటుతో మూడు సార్లు ఐదు వికెట్ల ఘనత సాధించడంతో పాటు 8/90 కెరీర్ బెస్ట్ ఫస్ట్క్లాస్ గణాంకాలు నమోదు చేశాడు. అయితే అదే రంజీ సీజన్లో అకీబ్ నబీ 60 వికెట్లు తీసి అందరి దృష్టిని ఆకర్షించాడు. 12.56 సగటుతో అద్భుత ప్రదర్శన చేయడంతో అతడికి శ్రీలంక టెస్టు సిరీస్కు అవకాశం దక్కింది.
ఇటీవల షమీ పునరాగమనంపై స్పందించిన అజిత్ అగార్కర్, టెస్టు క్రికెట్ ఆడేందుకు అవసరమైన పూర్తి ఫిట్నెస్ ప్రస్తుతం షమీ వద్ద లేదని పేర్కొన్నారు. దీంతో సెలెక్టర్లు ఇప్పుడు కేవలం అనుభవం కంటే ఫిట్నెస్, దేశవాళీ ప్రదర్శనలకు ఎక్కువ ప్రాధాన్యం ఇస్తున్నారనే విషయం స్పష్టమైంది. భవిష్యత్తులో టెస్టు జట్టులోకి తిరిగి రావాలంటే షమీ దులీప్ ట్రోఫీ వంటి టోర్నీల్లో నిలకడగా రాణించడంతో పాటు పూర్తి ఫిట్నెస్ నిరూపించుకోవాల్సిన పరిస్థితి కనిపిస్తోంది. ప్రస్తుతం యువ పేసర్లు కేవలం జట్టులో చోటు కోసం కాకుండా తుది జట్టులో స్థానం కోసం కూడా తీవ్ర పోటీ ఇస్తుండటంతో షమీకి పునరాగమనం అంత సులభం కాదనే అభిప్రాయం వ్యక్తమవుతోంది.