కోలీవుడ్ స్టార్ హీరో తమిళగ వెట్రి కళగం (TVK) అధినేత దళపతి విజయ్కు న్యాయస్థానంలో ఊరట లభించింది. తన ఎన్నికల అఫిడవిట్లో తప్పుడు సమాచారం ఇచ్చారంటూ దాఖలైన పిటిషన్ను మద్రాస్ హైకోర్టు కొట్టివేసింది. అటు రాజకీయాలు, ఇటు సినిమాలు, భార్యతో విడాకులు, మరోవైపు న్యాయపరమైన చిక్కులతో సతమతమవుతున్న విజయ్కు ఇది నిజంగా శుభవార్తే.
ఏమిటా వివాదం?
పెరంబూర్ నియోజకవర్గ ఓటరు వెంకటేష్ ఈ పిటిషన్ను దాఖలు చేశారు. విజయ్ తన భార్య సంగీతకు రూ. 12.60 కోట్ల అప్పు ఇచ్చినట్లు అఫిడవిట్లో పేర్కొనడంపై ఆయన అభ్యంతరం వ్యక్తం చేశారు. విజయ్-సంగీత దంపతులు విడాకుల కోసం దరఖాస్తు చేసుకున్నారని, అటువంటప్పుడు ఈ భారీ రుణం ఎలా ఇచ్చారని పిటిషనర్ అనుమానం వ్యక్తం చేశారు. అలాగే, ఒక ప్రైవేట్ విద్యా ట్రస్ట్కు ఇచ్చిన రూ. 20 కోట్లపై కూడా స్పష్టత లేదని, ఆస్తుల వివరాలను దాచడం ఓటర్లను మోసం చేయడమేనని వాదించారు.
అయితే, చీఫ్ జస్టిస్ ఎస్ఏ ధర్మాధికారి, జస్టిస్ జి. అరుళ్మురుగన్లతో కూడిన ధర్మాసనం ఈ వాదనను తోసిపుచ్చింది. ఇదే అంశంపై గతంలో దాఖలైన పిటిషన్ను ఇప్పటికే కొట్టివేసినందున, మళ్లీ దీనిని విచారించలేమని స్పష్టం చేసింది. అయితే, మరో కేసులో రూ. 100 కోట్ల ఆస్తుల వెల్లడిపై విచారణ ఇంకా కొనసాగుతుంది.
ఎన్నికల బరిలో దళపతి ..
తమిళనాడు అసెంబ్లీ ఎన్నికలు అత్యంత ఉత్కంఠభరితంగా సాగాయి. అటు అధికార DMK కూటమి, ఇటు AIADMK-BJP కూటములకు దీటుగా విజయ్ తన TVK పార్టీతో ముక్కోణపు పోటీని నెలకొల్పారు. ఈ పోలింగ్లో తమిళనాడులో ఏకంగా 85.1 శాతం ఓటింగ్ నమోదవ్వడం విశేషం. ఈ భారీ ఓటింగ్ శాతం ఎవరికి అనుకూలంగా మారుతుందనేది ఆసక్తికరంగా మారింది. మే 4న వెలువడనున్న ఫలితాల కోసం అందరూ వేచి చూస్తున్నారు.
ALSO READ : బాక్సాఫీస్ రికార్డులను తిరగరాస్తున్న ‘మైఖేల్’..
‘జన నాయగన్’ కష్టాలు..
మరోవైపు విజయ్ చివరి చిత్రం ‘జన నాయగన్’ అనేక అడ్డంకులను ఎదుర్కొంటోంది. సెన్సార్ బోర్డు (CBFC)తో వివాదాల వల్ల ఈ సినిమా విడుదల నిరంతరం వాయిదా పడుతూ వస్తోంది. అక్టోబర్ 2025లో విడుదల కావాల్సిన ఈ చిత్రం, ఇప్పటికీ థియేటర్లలోకి రాలేదు. సెన్సార్ జాప్యం కారణంగా అమెజాన్ ప్రైమ్ వీడియో కూడా ఈ సినిమా ఓటీటీ ఒప్పందం నుండి తప్పుకుంది. దీనికి తోడు సినిమా పైరసీ లీక్ అవ్వడం వల్ల సుమారు రూ. 300 నుంచి 400 కోట్ల నష్టం వాటిల్లవచ్చని అంచనా వేస్తున్నారు . రాజకీయ భవిష్యత్తు తేలాల్సి ఉండటం, చివరి సినిమా చిక్కుల్లో పడటంతో దళపతి విజయ్ కెరీర్లో ఇది అత్యంత కీలకమైనది. మే 4న వచ్చే ఫలితాలు ఆయన పొలిటికల్ ఇన్నింగ్స్కు దిక్సూచి కానున్నాయి..