- పరేడ్ గ్రౌండ్స్లో భారీ బహిరంగ సభకు ప్లాన్
- సికింద్రాబాద్ రైల్వే స్టేషన్ ఓపెనింగ్
హైదరాబాద్, వెలుగు: దేశ ప్రధానిగా వరుసగా మూడోసారి బాధ్యతలు చేపట్టిన తర్వాత నరేంద్ర మోదీ తొలిసారిగా తెలంగాణకు రానున్నారు. దాదాపు రెండేళ్ల విరామం తర్వాత ఆయన వచ్చే నెల 10న రాష్ట్ర పర్యటనకు వస్తున్నారు. ఈ సందర్భంగా రాష్ట్రంలో రూ.7,500 కోట్ల అభివృద్ధి పనులకు శంకుస్థాపన, ప్రారంభోత్సవాలు చేయనున్నారు. ములుగు జిల్లాలో ఏర్పాటు చేసిన సమ్మక్క సారక్క సెంట్రల్ ట్రైబల్ యూనివర్సిటీ భవన నిర్మాణానికి ఆయన శంకుస్థాపన చేసే చాన్స్ ఉంది. యాదాద్రి వరకు ఎంఎంటీఎస్ట్రెయిన్పొడిగింపు పనులకు, వరంగల్మామునూరు ఎయిర్పోర్టు అభివృద్ధి పనులకు కూడా ఆయన భూమిపూజ చేసే అవకాశం ఉందని సమాచారం. వీటితో పాటు సికింద్రాబాద్ రైల్వే స్టేషన్ మొదటి దశ పనులు దాదాపు పూర్తికావొచ్చాయి. ప్రధాని తన పర్యటనలో ఈ పనులను ప్రారంభించి జాతికి అంకితం చేసే అవకాశం ఉంది. బీబీనగర్ ఎయిమ్స్, కాజీపేట వర్క్ స్టేషన్ తదితర వాటినీ ప్రారంభించే చాన్స్ ఉంది.
పరేడ్ గ్రౌండ్స్లో భారీ బహిరంగ సభ
ప్రధాని రాక సందర్భంగా లక్ష మందితో పరేడ్ గ్రౌండ్స్ లో సభ పెట్టేందుకు బీజేపీ శ్రేణులు భారీ ఏర్పాట్లు చేస్తున్నాయి. మోదీ సభకు జెన్జీతో పాటు స్ట్రీట్ వెండర్స్, కేంద్ర ప్రభుత్వ పథకాల లబ్ధిదారులు, మహిళలు ఎక్కువ గా హాజరయ్యేలా వ్యూహ రచన చేస్తున్నారు. సభకు జీహెచ్ఎంసీ పరిధిలోని ఒక్కో డివిజన్ నుంచి 1500 మంది తీసుకొచ్చేలా ఏర్పాట్లు చేస్తున్నారు.