Vegetable Chips: ఈ వర్షాకాలం సాయంత్రం కాస్త క్రిస్పీగా ఏదైనా తినాలి అనిపిస్తుంటుంది. బయట నుంచి ఏమైనా స్నాక్స్, ఫుడ్స్ తెచ్చుకుందామంటే.. ముందే వర్షాకాలం. ఎలాంటి నూనెలు వాడుతున్నారో, క్వాలిటీ ఎలా ఉందో అనే భయం మొదలవుతుంది. చిన్న పిల్లలకు బయట ఫుడ్స్ పెట్టాలంటే ఆ భయం కాస్త రెట్టింపు అవుతోంది. అందుకే ఇంట్లోనే కేవలం 30 నిమిషాల్లో క్రిస్పీగా, రుచిగా ఉండే వెజిటెబుల్ చిప్స్ ఎలా తయారు చేసుకోవాలో చూద్దాం. ఎలాంటి నూనె వాడకుండా(జీరో ఆయిల్) చేసుకునే ఈ చిప్స్ ఆరోగ్యానికి ఎంతో మంచివి.
కావలసిన పదార్థాలు
* మీకిష్టమైన కూరగాయలు (బంగాళాదుంపలు, బీట్రూట్, క్యారెట్, జుకినీ, స్వీట్ పొటాటో మొదలైనవి)
* రుచికి సరిపడా ఉప్పు, మిరియాల పొడి
తయారీ విధానం
ముందుగా మీరు తీసుకున్న కూరగాయలను వీలైనంత పల్చగా (సుమారు 1/6 ఇంచ్ మందంలో) స్లైస్ చేయండి. ముక్కలు సమానంగా రావడం కోసం మండోలిన్ స్లైసర్ (Mandoline Slicer) వాడటం మంచిది. బంగాళాదుంప ముక్కలను కనీసం 30 నిమిషాల పాటు నీటిలో నానబెట్టాలి. బీట్రూట్ ముక్కలను 10 నిమిషాలు వేరే గిన్నెలోని నీటిలో నానబెట్టండి. ఇలా చేస్తే వీటి రంగు వేరే కూరగాయలకు అంటుకోకుండా ఉంటుంది. నానిన తర్వాత నీటిని పూర్తిగా వంపేసి, పొడి గుడ్డతో ముక్కలను తడి లేకుండా తుడుచుకోవాలి. క్యారెట్, జుకినీ వంటి కూరగాయలను నీటిలో నానబెట్టాల్సిన అవసరం లేదు. తడి లేని కూరగాయల ముక్కలను బేకింగ్ ట్రేపై ఒకదానికొకటి తగలకుండా పరచండి. ఇక, ఓవెన్ను 300°F (సుమారు 150°C) దగ్గర ప్రీ-హీట్ చేయండి. బేకింగ్ ట్రేపై పార్చ్మెంట్ పేపర్ లేదా సిలికాన్ మ్యాట్ వేసి పక్కన పెట్టుకోండి. వీటిని ఓవెన్లో పెట్టి 15 నిమిషాలు బేక్ చేయండి. తర్వాత ట్రే బయటకు తీసి, ముక్కలను జాగ్రత్తగా తిరగేసి (flip) మరో 15 నిమిషాలు బేక్ చేయండి. కొన్ని కూరగాయలు వేగంగా, మరికొన్ని కాస్త నిమ్మదిగా కాలవచ్చు. క్రిస్పీగా అవ్వని ముక్కలను మరో 5-10 నిమిషాల పాటు బేక్ చేయండి. ముక్కలు పూర్తిగా చల్లారిన తర్వాత వాటిపై కొద్దిగా ఉప్పు, మిరియాల పొడి చల్లుకుని తింటే ఎంతో రుచిగా ఉంటాయి. ఈ చిప్స్ను తయారు చేసిన రోజే తింటే చాలా క్రిస్పీగా ఉంటాయి. మిగిలితే గాలి చొరబడని డబ్బాలో (Airtight Container) నిల్వ చేసుకోవచ్చు.