చెస్ట్నట్స్లో ఉండే కాంప్లెక్స్ కార్బోహైడ్రేట్లు శరీరానికి శక్తిని అందించడంలో సహాయపడతాయి. అలాగే ఫైబర్ ఎక్కువగా ఉండటం వల్ల కడుపు నిండిన భావన ఎక్కువసేపు ఉండటానికి దోహదపడుతుంది. దీంతో మధ్యాహ్నం లేదా సాయంత్రం అనవసరంగా స్నాక్స్ తినాలనే కోరికను నియంత్రించుకోవడానికి ఇవి ఉపయోగపడవచ్చు. మరి ఛెస్ట్నట్స్లో ఉన్న పోషకాలు ఏంటి? వీటిని ఎలా తీసుకోవాలి? తెలుసుకుందాం.
1. తక్కువ కేలరీల నట్స్ ఇవే
స్పానిష్ న్యూట్రిషన్ ఫౌండేషన్ ప్రకారం ఛెస్ట్నట్స్ ఇతర నట్స్తో పోలిస్తే తక్కువ కేలరీలు కలిగిన వాటిలో ఒకటి. అందుకే ఆరోగ్యకరమైన స్నాక్ కోసం చూస్తున్నవారికి ఇవి మంచి ఎంపికగా ఉంటాయి.
2. ఫైబర్ పుష్కలం
చెస్ట్నట్స్లో ఫైబర్ అధికంగా ఉంటుంది. ఇది కడుపు నిండిన భావనను పెంచడంలో, జీర్ణవ్యవస్థ ఆరోగ్యానికి తోడ్పడటంలో ఉపయోగపడుతుంది. నట్స్లోని ఫైబర్ కొలెస్ట్రాల్ నియంత్రణకు కూడా సహాయపడుతుందని మాయో క్లినిక్ పేర్కొంటుంది.
3. విటమిన్ B6 ప్రత్యేకత ఏంటి?
చెస్ట్నట్స్లో విటమిన్ B6 సమృద్ధిగా ఉంటుంది. నాడీ వ్యవస్థ, రోగనిరోధక వ్యవస్థ సక్రమంగా పనిచేయడానికి ఈ విటమిన్ అవసరం. మెదడు అభివృద్ధిలో కూడా విటమిన్ B6 కీలక పాత్ర పోషిస్తుంది.
4. శరీరానికి శక్తిని అందిస్తాయి
చెస్ట్నట్స్లో కాంప్లెక్స్ కార్బోహైడ్రేట్లు ఎక్కువగా ఉంటాయి. ఇవి శరీరానికి ముఖ్యమైన శక్తి వనరుల్లో ఒకటి. అందుకే అలసటగా అనిపించే సమయంలో వీటిని ఆహారంలో చేర్చుకోవడం ఉపయోగకరంగా ఉండవచ్చు.
5. పచ్చిగా తినకపోవడమే మంచిది
పచ్చి ఛెస్ట్నట్స్లో టానిన్లు ఉంటాయి. ఇవి కొంతమందిలో కడుపులో అసౌకర్యానికి కారణం కావచ్చు. అందుకే వీటిని నేరుగా పచ్చిగా తినడం కంటే కాల్చడం లేదా బేక్ చేసి తీసుకోవడం మంచిదని నిపుణులు సూచిస్తున్నారు.
6. ఇలా ఆహారంలో చేర్చుకోవచ్చు
చెస్ట్నట్స్ను ఉదయం ఓట్స్లో కలిపి తీసుకోవచ్చు. పాన్కేక్లపై టాపింగ్గా ఉపయోగించవచ్చు. బ్లూబెర్రీస్, ఫెటా చీజ్తో కలిపి సలాడ్లో వేసుకోవచ్చు. అలాగే వీటితో క్రీమ్ కూడా తయారు చేసుకోవచ్చు.
గమనిక:
ఈ కథనం ఆరోగ్య అవగాహన కోసం మాత్రమే. ఏ ఆహారమైనా పరిమిత మోతాదులో, సమతుల ఆహారంలో భాగంగా తీసుకోవడం మంచిది. జీర్ణ సంబంధిత సమస్యలు లేదా ఇతర ఆరోగ్య సమస్యలు ఉన్నవారు ఆహారంలో మార్పులు చేసుకునే ముందు వైద్య నిపుణుల సలహా తీసుకోవాలి.