మనలో చాలామంది ఏ కూర వండినా అందులో కరివేపాకు, కొత్తిమీర వేయందే వంట పూర్తయినట్లు ఫీల్ అవ్వం. వంటకానికి మంచి వాసన, రుచి రావడానికి ఇవి ఎంతో అవసరం. అయితే వీటిని కేవలం రుచి కోసం లేదా కూర పైన అలంకరించడానికి మాత్రమే వాడతామని అనుకుంటే పొరబడినట్లే. ఈ రెండు ఆకుల్లోనూ మన ఆరోగ్యానికి మేలు చేసే ఎన్నో ఔషధ గుణాలు దాగున్నాయి. మరి ఈ రెండింటిలో ఏది ఎక్కువ ఆరోగ్యకరమో తెలుసుకుందామా…..
కరివేపాకు వల్ల ఆరోగ్య ప్రయోజనాలు
*కరివేపాకు తినడం వల్ల క్లోమంలో (Pancreas) ఇన్సులిన్ను తయారు చేసే కణాలు రక్షించబడతాయి. దీనివల్ల రక్తంలో చక్కెర (బ్లడ్ షుగర్) స్థాయిలు కంట్రోల్లో ఉంటాయి.
* కరివేపాకు మన కాలేయాన్ని (Liver) చెడు వ్యర్థాలు, విష పదార్థాలు, ఆక్సీకరణ ఒత్తిడి నుండి కాపాడుతుంది.
*కరివేపాకు నూనె జుట్టు త్వరగా నెరసిపోకుండా ఆపడంలో, చర్మ సంబంధిత ఇన్ఫెక్షన్లను తగ్గించడంలో అద్భుతంగా పనిచేస్తాయి.
*మన దేశంలో చాలామందిలో కనిపించే రక్తహీనత (Anemia) సమస్యను తగ్గించడానికి కరివేపాకులోని ఐరన్ బాగా ఉపయోగపడుతుంది. అలాగే ఎముకల బలానికి కాల్షియం కూడా ఇందులో పుష్కలంగా ఉంటుంది.
కొత్తిమీర ఆకుల వల్ల ఆరోగ్య ప్రయోజనాలు
*కొత్తిమీర శరీరంలో చెడు కొలెస్ట్రాల్ను (LDL) తగ్గించి, మంచి కొలెస్ట్రాల్ను (HDL) పెంచడానికి సహకరిస్తుంది.
*ఇందులో ఉండే ప్రత్యేక నూనెలు (లినలూల్) కడుపులోని ఎంజైమ్లను ఉత్తేజపరుస్తాయి. దీనివల్ల తిన్న వెంటనే వచ్చే కడుపు ఉబ్బరం, బరువుగా అనిపించడం వంటి సమస్యలు తగ్గుతాయి.
* కొత్తిమీరలో రోగనిరోధక శక్తిని పెంచే విటమిన్ సి, రక్తం గడ్డకట్టడానికి సహాయపడే విటమిన్ కె, గుండె ఆరోగ్యానికి అవసరమైన ఫోలేట్ (విటమిన్ బి9) పుష్కలంగా ఉంటాయి.
శాస్త్రీయంగా ఏది బెస్ట్?
కరివేపాకు ఆకులో ఉండే ప్రత్యేక పోషకాలు ఎంత వేడిలో వండినా చెక్కుచెదరవు. ముఖ్యంగా కాలేయాన్ని కాపాడుకోవడంలో, మధుమేహాన్ని కంట్రోల్ చేయడంలో, దీర్ఘకాలిక ఆరోగ్య సమస్యల విషయంలో కరివేపాకు చాలా ముందుంటుంది.
కొత్తిమీర మన శరీరానికి రోజూ కావలసిన విటమిన్లను అందిస్తుంది. ముఖ్యంగా జీర్ణవ్యవస్థను ఆరోగ్యంగా ఉంచడంలో, శరీరాన్ని శుభ్రపరచడంలో బాగా పనిచేస్తుంది.
ALSO READ : ఆగస్టు 9 చాలా పవర్ఫుల్ డే .. ఆరోజు ఏ రాశి వారు ఏం చేయాలి..
ఈ రెండింటిలో ఏది బెస్ట్ అని ఆలోచించే బదులు, రెండింటినీ కలిపి తీసుకోవడం చాలా మంచిది. ఈ రెండింటినీ కలిపి ‘పచ్చడి’ చేసుకొని తింటే మరింత లాభం ఉంటుంది. కొత్తిమీరలో ఉండే విటమిన్ సి వల్ల, కరివేపాకులో ఉన్న ఐరన్ను మన శరీరం చాలా సులభంగా పీల్చుకుంటుంది.
ఈ రెండింటిలో ఏది ఎక్కువ ఆరోగ్యకరమైనది అంటే… రెండూ సమానమే కానీ వాటి పనితీరు వేరు. దీర్ఘకాలిక ఆరోగ్యానికి, డయాబెటిస్ కంట్రోల్ కోసం కరివేపాకు చాలా మంచిది. రోజూ మన శరీరానికి కావలసిన విటమిన్లు, మంచి జీర్ణశక్తి కోసం కొత్తిమీర ఎంతో అవసరం.