ఐకాన్ స్టార్ అల్లు అర్జున్, కోలీవుడ్ సెన్సేషనల్ డైరెక్టర్ అట్లీ కాంబినేషన్లో పట్టాలెక్కబోతున్న భారీ పాన్ ఇండియా చిత్రం ‘రాకా’ గురించి ఒక ఆసక్తికరమైన వార్త నెట్టింట చక్కర్లు కొడుతోంది. ఇటీవల విడుదలైన షాకింగ్ ఫస్ట్ లుక్ పోస్టర్ సినిమాపై ఇప్పటికే భారీ హైప్ను క్రియేట్ చేయగా, ఇప్పుడు ఈ సినిమా కథా నేపథ్యంపై వస్తున్న లీకులు ఫ్యాన్స్ను ఆశ్చర్యానికి గురిచేస్తున్నాయి.
మనకు తెలిసి ఈ సినిమాను అట్లీ కేవలం ఒక మాస్ యాక్షన్ ఎంటర్టైనర్గా మాత్రమే కాకుండా, సైన్స్ ఫిక్షన్ ఎలిమెంట్స్కు మైథాలజీని జోడించి రూపొందిస్తున్నారట. ముఖ్యంగా ‘తోడేళ్లు’ (Werewolves) కు సంబంధించి పురాణాల్లో ఉన్న కొన్ని రహస్య అంశాలను ఈ కథలో కీలకంగా వాడుకున్నట్లు తెలుస్తోంది. ఒకవేళ ఇదే నిజమైతే, బన్నీని ముందెన్నడూ చూడని ఒక విభిన్నమైన సాహసోపేత పాత్రలో చూడటం ఖాయం. మైథాలజీని మోడ్రన్ టెక్నాలజీతో కలిపి అట్లీ ఇచ్చే ట్రీట్ ఆడియన్స్కు ఒక సరికొత్త అనుభూతిని అందించబోతోంది. ఈ భారీ ప్రాజెక్ట్లో బన్నీ సరసన గ్లోబల్ బ్యూటీ దీపికా పదుకోన్ హీరోయిన్గా నటిస్తుండటం విశేషం. సన్ పిక్చర్స్ అత్యంత భారీ బడ్జెట్తో నిర్మిస్తున్న ఈ చిత్రానికి యంగ్ సెన్సేషన్ సాయి అభ్యంకార్ సంగీతాన్ని అందిస్తున్నారు. అట్లీ మార్క్ మాస్ ఎలిమెంట్స్కు తోడు, ఈ మైథాలజీ టచ్ తోడైతే బాక్సాఫీస్ వద్ద రికార్డులు తిరగరాయడం ఖాయమని ట్రేడ్ వర్గాలు విశ్లేషిస్తున్నాయి.