నీట్ పేపర్ లీక్కు వ్యతిరేకంగా గతంలో జరిగిన నిరసనల్లో పాల్గొన్న విద్యార్థులకు ఎలాంటి పెద్ద నేర చరిత్ర లేకపోతే, వారిపై నమోదైన పోలీసు కేసులను (ఎఫ్ఐఆర్లు) రాష్ట్ర ప్రభుత్వాలు లేదా ఢిల్లీ ప్రభుత్వం తొలగించొచ్చు అని సుప్రీంకోర్టు స్పష్టం చేసింది.
ప్రధాన న్యాయమూర్తి సూర్య కాంత్ నేతృత్వంలోని త్రిసభ్య ధర్మాసనం ఈ కీలక తీర్పు వెలువరించింది. తీవ్రమైన, ఘోరమైన నేరాలు చేసిన వారు మినహా, మిగతా విద్యార్థులపై కేసులు ఉండకూడదనే ఉద్దేశంతో ఉన్నట్లు కేంద్ర ప్రభుత్వం తరఫున సొలిసిటర్ జనరల్ తుషార్ మెహతా కోర్టుకు తెలిపారు. అయితే, పెద్ద ఎత్తున తీవ్ర నేరాల చరిత్ర ఉన్న 2,700 మందికి పైగా వ్యక్తులపై ఉన్న కేసులను మాత్రం వెనక్కి తీసుకోబోమని స్పష్టం చేశారు.
పోలీసుల తీరుపై ఆగ్రహం:
నిరసనల సమయంలో న్యాయవాదుల పిల్లలపై కూడా దాడులు జరిగాయని, దీనికి సంబంధించిన 300 వీడియోలను కోర్టుకు సమర్పించామని సీనియర్ లాయర్ గోపాల్ శంకరనారాయణన్ తెలిపారు. పోలీసుల దురాగతాలపై పోలీస్ కమిషనర్ విచారణ జరపాలని కోరారు.
కేవలం ఆందోళన జరుగుతోందన్నంత మాత్రాన పోలీసులు లాఠీచార్జి చేయడాన్ని సమర్థించలేమని సుప్రీంకోర్టు గతంలోనే స్పష్టం చేసింది. శాంతియుతంగా నిరసన తెలిపే హక్కు అందరికీ ఉంటుందని గుర్తుచేసింది.
జూలై 20న ఢిల్లీలో పార్లమెంటు వైపు వెళ్తున్న నిరసనకారులను చెదరగొట్టడానికి పోలీసులు లాఠీలు, బాష్పవాయువు ప్రయోగించిన విషయం తెలిసిందే. అయితే ఈ కేసు తదుపరి విచారణను సుప్రీంకోర్టు ఆగస్టు 18కి వాయిదా వేసింది.