ఒడిశాలో ఇటీవల జరిగిన రాజ్యసభ ఎన్నికల్లో క్రాస్ ఓటింగ్కు పాల్పడిన ఆరుగురు ఎమ్మెల్యేలను బిజు జనతా దళ్ (బీజేడీ) పార్టీ సస్పెండ్ చేసింది. పార్టీ అధినేత నవీన్ పట్నాయక్ అధ్యక్షతన జరిగిన రాజకీయ వ్యవహారాల కమిటీ సమావేశంలో ఈ నిర్ణయం తీసుకున్నట్లు పార్టీ వర్గాలు వెల్లడించాయి. సస్పెండ్ అయిన ఎమ్మెల్యేల్లో బలిగూడా నియోజకవర్గానికి చెందిన చక్రమణి కన్హర్, జయదేవ్కు చెందిన నబా కిశోర్ మాలిక్, చౌద్వార్-కటక్ నుంచి సౌవిక్ బిస్వాల్, బస్తా నుంచి సుభాసిని జేనా, తిర్తోల్ నుంచి రామకాంత్ భోయి, బంకీ నియోజకవర్గానికి చెందిన దేవీ రంజన్ త్రిపాఠి ఉన్నారు. ఈ ఎమ్మెల్యేలకు మార్చి 17న షోకాజ్ నోటీసులు జారీ చేయగా, వారు శుక్రవారం సాయంత్రం తమ వివరణలు సమర్పించారు.
అయితే ఆ వివరణలు సంతృప్తికరంగా లేవని అసెంబ్లీలో బీజేడీ చీఫ్ విప్ ప్రమిళా మాలిక్ తెలిపారు. 147 సభ్యుల ఒడిశా అసెంబ్లీలో అధికార బీజేపీకి మద్దతుగా ఉన్న ఎమ్మెల్యేలు మొత్తం 82 మంది ఉండగా, రాజ్యసభ ఎన్నికల్లో బీజేపీ అభ్యర్థులు 93 ప్రాధాన్యత ఓట్లు సాధించడం రాజకీయంగా చర్చనీయాంశమైంది. ఈ అదనపు ఓట్లలో ఎనిమిది బీజేడీ ఎమ్మెల్యేలవి, మూడు కాంగ్రెస్ ఎమ్మెల్యేలవి అని అధికారిక వర్గాలు తెలిపాయి. ఈ పరిణామం ఒడిశా రాజకీయాల్లో కలకలం రేపుతుండగా, బీజేడీ క్రమశిక్షణ చర్యలు పార్టీ అంతర్గత పరిస్థితులను స్పష్టంగా చూపిస్తున్నాయని విశ్లేషకులు భావిస్తున్నారు.