ప్రముఖ ఈ-కామర్స్ సంస్థ ‘ఫ్లిప్కార్ట్’ చేసిన ఒక వినూత్న ప్రకటన కారణంగా ఈ గ్రామం మళ్లీ సోషల్ మీడియాలో వైరల్ అవుతోంది. ప్రతిదీ జంటగా ఉండే ఈ ఊరి నేపథ్యాన్ని ఉపయోగించుకుని, ‘డబుల్ ఆఫర్స్’ మరియు ‘డబుల్ వాల్యూ’ అనే కాన్సెప్ట్తో ఆ సంస్థ ఒక యాడ్ క్యాంపెయిన్ చేపట్టింది. ఈ సృజనాత్మక ఆలోచన నెటిజన్లను ఎంతగానో ఆకట్టుకుంటోంది.
ఆశ్చర్యపరిచే గణాంకాలు
కొడింహి గ్రామంలోని మొత్తం జనాభాలో సుమారు 20 శాతం మంది కవలలే ఉండటం విశేషం. సాధారణంగా భారతదేశంలో కవలల పుట్టుక రేటు చాలా తక్కువగా ఉంటుంది. కానీ ఈ గ్రామంలో సుమారు 2,000 కుటుంబాలు ఉండగా, అందులో 400 నుండి 550 జంటల కవలలు ఉన్నారు. అంటే ప్రతి 1,000 జననాల్లో సుమారు 42 నుండి 45 మంది కవలలు పుడుతున్నారు. ఇది భారత సగటు కంటే దాదాపు ఏడు రెట్లు ఎక్కువ. గడచిన ఆరు ఏడు దశాబ్దాలుగా ఈ ట్రెండ్ కొనసాగుతుండటం గమనార్హం.
సైన్స్కు అంకిచిక్కని మిస్టరీ
కొడింహిలో ఇంత భారీ సంఖ్యలో కవలలు పుట్టడానికి గల కారణాలను అన్వేషించడానికి జాతీయ, అంతర్జాతీయ పరిశోధనా సంస్థలు ఎన్నో ఏళ్లుగా కృషి చేస్తున్నాయి.
- పర్యావరణం: ఇక్కడి నీరు లేదా ఆహారం వల్ల ఇలా జరుగుతుందా అని పరీక్షలు చేసినా ఎటువంటి ఆధారాలు దొరకలేదు.
- జన్యువులు: కొడింహి గ్రామానికి చెందిన మహిళలు వేరే ప్రాంతాలకు వెళ్లి పెళ్లి చేసుకున్నప్పటికీ, అక్కడ కూడా కవలలకే జన్మనివ్వడం చూస్తుంటే ఇది జన్యుపరమైన అంశమని అనిపిస్తుంది. కానీ దీనికి బాధ్యత వహించే నిర్దిష్ట జన్యువును శాస్త్రవేత్తలు ఇంకా గుర్తించలేకపోయారు.
- అపోహలు: కాలుష్యం లేదా మరేదైనా రసాయనాల ప్రభావం వల్ల ఇలా జరుగుతుందనే వాదనలను శాస్త్రవేత్తలు ఇప్పటికే తోసిపుచ్చారు.
కవలల సంఘం (TAKA)
స్థానిక ప్రజలు కవలల పుట్టుకను దైవ ప్రసాదంగా భావిస్తారు. తమ ప్రత్యేక గుర్తింపును కాపాడుకోవడానికి 2008లో గ్రామస్థులు ‘ట్విన్స్ అండ్ కిన్స్ అసోసియేషన్’ (TAKA) అనే సంస్థను ఏర్పాటు చేసుకున్నారు. ఈ సంఘం కవలల పుట్టుకను ట్రాక్ చేయడమే కాకుండా, కవలలు ఉన్న కుటుంబాలకు అండగా నిలుస్తూ పరిశోధకులకు సహకరిస్తోంది. ప్రపంచంలో ఇంత ఎక్కువ మంది కవలలు ఉన్న ప్రాంతం కేరళలో ఉండటం నిజంగా అద్భుతమే.