ఐసీసీ టీ20 ర్యాంకింగ్స్‌‌.. ఇషాన్‌‌ నంబర్ 1.. రెండో స్థానంలో అభిషేక్‌‌

తాజాగా విడుదలైన ఐసీసీ  టీ20 ర్యాంకింగ్స్‌‌లో భారత ఓపెనర్‌‌ ఇషాన్‌‌ కిషన్ ప్రపంచ నంబర్‌‌–1 బ్యాటర్‌‌గా నిలవగా, అభిషేక్‌‌ శర్మ రెండో స్థానంలో కొనసాగుతున్నారు. అలాగే టీ20 కెప్టెన్‌‌ శ్రేయస్‌‌ అయ్యర్ ర్యాంకింగ్స్‌‌లో ఏకంగా 425 స్థానాలు ఎగబాకి  93వ ర్యాంక్‌‌కు చేరుకున్నాడు.  

ఢిల్లీ: యూకే పర్యటనలో నిరాశపరిచిన భారత జట్టుకు తాజా ఐసీసీ టీ20 ర్యాంకింగ్స్‌‌ ఊరటనిచ్చాయి. జట్టు వైఫల్యాల మధ్య కూడా భారత బ్యాటర్లు ప్రపంచ ర్యాంకింగ్స్‌‌లో తమ ఆధిపత్యాన్ని కొనసాగించారు. ఓపెనర్‌‌ ఇషాన్‌‌ కిషన్ ప్రపంచ నంబర్‌‌–1 టీ20 బ్యాటర్‌‌గా నిలవగా, అభిషేక్‌‌ శర్మ రెండో స్థానాన్ని నిలబెట్టుకున్నాడు.

ఐర్లాండ్‌‌తో టీ20 సిరీస్‌‌ను 2–0తో కోల్పోయిన భారత్‌‌, ప్రస్తుతం ఇంగ్లండ్‌‌తో జరుగుతున్న ఐదు మ్యాచ్‌‌ల సిరీస్‌‌లో తొలి మ్యాచ్‌‌ వర్షం కారణంగా రద్దు కాగా, తర్వాతి రెండు మ్యాచ్‌‌ల్లో ఓడింది. మూడో టీ20లో 125 పరుగుల తేడాతో పరాజయం పాలవడం టీ20 చరిత్రలో అది భారత్​కు భారీ ఓటమిగా మిగిలింది. అయినా భారత కొత్త టీ20 కెప్టెన్‌‌ శ్రేయస్‌‌ అయ్యర్ ర్యాంకింగ్స్‌‌లో పురోగతి సాధించాడు.

ఇంగ్లండ్‌‌తో తొలి మ్యాచ్‌‌లో 68, రెండో మ్యాచ్‌‌లో 37 పరుగులు చేయడంతో ఏకంగా 425 స్థానాలు ఎగబాకి 93వ ర్యాంక్‌‌కు చేరుకున్నాడు. ఇంగ్లండ్‌‌ ఆటగాళ్లు కూడా ర్యాంకింగ్స్‌‌లో లాభపడ్డారు. రెండో టీ20లో 76 పరుగులు చేసిన జేకబ్‌‌ బెథెల్ ఎనిమిదో ర్యాంక్‌‌కు చేరుకున్నాడు. సామ్‌‌ కరన్ బ్యాటింగ్‌‌లో 108వ స్థానానికి, బౌలింగ్‌‌లో సంయుక్త 71వ స్థానానికి చేరగా, ఆల్‌‌రౌండర్ల జాబితాలో సంయుక్త 13వ స్థానాన్ని దక్కించుకున్నాడు. లెగ్‌‌స్పిన్నర్‌‌ ఆదిల్‌‌ రషీద్ బౌలర్ల ర్యాంకింగ్స్‌‌లో మూడో స్థానానికి చేరుకున్నాడు.