మహిళల జీతం.. కానీ తమపై ఖర్చు మాత్రం ఎంత?

ఉదయం లేచింది మొదలు ఇల్లు, ఆఫీస్ అంటూ మహిళలు రోజంతా ఉరుకులు పరుగుల జీవితాన్ని గడుపుతుంటారు. ఈ కష్టమంతా నెలాఖరున వచ్చే జీతం కోసమే. అయితే అలా సంపాదించిన డబ్బులో కనీసం పది శాతం కూడా తమ కోసం సొంతంగా ఖర్చు పెట్టుకోలేని స్థితిలో నేటి వర్కింగ్ ఉమెన్ ఉన్నారంటే నమ్ముతారా? అవును తాజా సర్వేలు కూడా ఇదే విషయాన్ని చెబుతున్నాయి. సంపాదిస్తున్నా కూడా తమకంటూ ఏమీ చేసుకోలేకపోతున్నామనే అసంతృప్తి మహిళల్లో ఎందుకు పెరుగుతుందో ఇప్పుడు సింపుల్‌గా తెలుసుకుందాం..

సర్వే ఏం చెబుతోంది?: ఇండియా లెండ్స్ నిర్వహించిన ‘వర్కింగ్ స్త్రీ’ సర్వే ప్రకారం.. చిన్న చిన్న ఉద్యోగాలు, వ్యాపారాలు చేస్తున్న మహిళలు తమ సంపాదనలో పది శాతం కూడా తమ కోసం స్వతంత్రంగా ఖర్చు పెట్టుకోలేకపోతున్నారు. ఇక జీతం రాగానే ఇల్లూ, ఒళ్లూ గుల్ల చేసుకుని సంపాదించిన డబ్బునంతా కుటుంబ అవసరాలకే ధారపోస్తున్నారు. తమకంటూ ఒక చిన్న వస్తువు కొనుక్కోవాలన్నా ఆలోచించాల్సిన పరిస్థితి నెలకొంది.

అన్నీ కుటుంబానికేనా?: పిల్లల స్కూల్ ఫీజులు, ఇంటి అద్దెలు, పెద్దల హాస్పిటల్ ఖర్చులు, ఇతర కుటుంబ అవసరాలకే మహిళల జీతం మొత్తం సరిపోతోంది. ఇక పిల్లల భవిష్యత్తు కోసం కుటుంబం కోసం ఆలోచించి ఖర్చు చేయడం చాలా మంచి విషయమే. కానీ ఇంత కష్టపడుతున్నా తమకంటూ ఏమీ చేసుకోలేకపోతున్నామనే ఒక రకమైన నిరాశ, లోటు వారిని మానసికంగా ఎంతో ఆవరిస్తోంది.

మానసిక సమస్యల ముప్పు: ఎలాంటి స్వప్రయోజనం, ఆనందం లేకుండా కేవలం ఇతరుల కోసమే మెషిన్‌లా కష్టపడుతూ పోవడం వల్ల దీర్ఘకాలంలో తీవ్రమైన మానసిక సమస్యలు వచ్చే ప్రమాదం ఉందని సైకాలజిస్టులు హెచ్చరిస్తున్నారు. ఇక అది పనిపై శ్రద్ధను తగ్గించడమే కాకుండా, జీవితంపై విరక్తి కలిగేలా చేస్తుంది. అందుకే మహిళలు సెల్ఫ్ కేర్ (స్వీయ సంరక్షణ) వైపు అడుగులు వేయాలి.

కనీసం 10 శాతం మీ కోసమే: ఇకనైనా మహిళలు తమ ఆలోచనా విధానాన్ని మార్చుకోవాలి. నెలాఖరున చేతికి జీతం రాగానే అందులో కనీసం పది శాతం డబ్బును కేవలం మీ కోసం మీ ఆనందం కోసం పక్కన పెట్టండి. ఇక మీకు నచ్చిన బట్టలు కొనుక్కోవడం, స్నేహితులతో గడపడం లేదా మీ అభిరుచుల కోసం ఆ డబ్బును వాడండి. అప్పుడే మీ మనసుకు ప్రశాంతత, చేస్తున్న పనిపై మరింత ఉత్సాహం పెరుగుతాయి.

ఇక కుటుంబాన్ని చూసుకోవడం ఎంత ముఖ్యమో, మిమ్మల్ని మీరు సంతోషంగా ఉంచుకోవడం కూడా అంతే ముఖ్యం. మీ కష్టార్జితంలో కొంత భాగాన్ని మీ ఆనందం కోసం ఖర్చు పెట్టడం తప్పు కాదు, అది మీ హక్కు. అప్పుడే అసంతృప్తి దరిచేరదు అని నిపుణులు తెలిపారు.

గమనిక: డబ్బులు దాచడం, కుటుంబానికి ఇవ్వడం మంచిదే అయినప్పటికీ, మానసిక ఆరోగ్యం బాగుండాలంటే ‘సెల్ఫ్ కేర్’ చాలా అవసరం. కాబట్టి ఈ నెల జీతం రాగానే ఫస్ట్ మీ కోసం కొంత కేటాయించుకోవడం అస్సలు మర్చిపోకండి.

The post మహిళల జీతం.. కానీ తమపై ఖర్చు మాత్రం ఎంత? appeared first on Manalokam – Latest Telugu News & Updates.