Good News : నిరుద్యోగులకు గుడ్ న్యూస్.. TGPSC నుండి మరో నోటిఫికేషన్
Good News : తెలంగాణలోని నిరుద్యోగులకు తెలంగాణ పబ్లిక్ సర్వీస్ కమిషన్ (TGPSC) ఒక మంచి వార్త చెప్పింది. టౌన్ అండ్ కంట్రీ ప్లానింగ్ డిపార్ట్మెంట్లో ఖాళీగా ఉన్న టౌన్ ప్లానింగ్ అసిస్టెంట్ (Town Planning Assistant) పోస్టుల భర్తీకి కమిషన్ తాజాగా జనరల్ రిక్రూట్మెంట్ నోటిఫికేషన్ను విడుదల చేసింది. అర్హత కలిగిన అభ్యర్థుల నుండి ఆన్లైన్ పద్ధతిలో దరఖాస్తులను ఆహ్వానిస్తున్నారు. అర్హులైన నిరుద్యోగ అభ్యర్థులు కమిషన్ అధికారిక వెబ్సైట్ ద్వారా తమ దరఖాస్తులను సమర్పించాల్సి ఉంటుంది.
ఖాళీలు, జీతభత్యాల వివరాలు
ఈ నోటిఫికేషన్ ద్వారా మొత్తం 07 టౌన్ ప్లానింగ్ అసిస్టెంట్ పోస్టులను భర్తీ చేయనున్నారు. ఇందులో స్టేట్ లెవెల్ క్యాడర్లో 02 ఖాళీలు ఉండగా, మల్టీ జోనల్ క్యాడర్ పరిధిలో 05 ఖాళీలు అందుబాటులో ఉన్నాయి. ఈ ఉద్యోగాలకు ఎంపికయ్యే అభ్యర్థులకు ప్రభుత్వం నెలకు రూ. 51,320 నుండి రూ. 1,27,310 వరకు ఆకర్షణీయమైన శాలరీ స్కేల్ను అందించనుంది.
విద్యార్హతలు , వయోపరిమితి
టౌన్ ప్లానింగ్ అసిస్టెంట్ పోస్టులకు దరఖాస్తు చేసుకోవాలనుకునే అభ్యర్థులు విధిగా బి.ప్లానింగ్ (B.Planning) లేదా బి.టెక్ ప్లానింగ్ (B.Tech Planning) విద్యార్హతను కలిగి ఉండాలి. అలాగే అభ్యర్థుల వయస్సు 01 జూలై 2026 నాటికి కనీసం 18 సంవత్సరాలు నిండి ఉండాలి , గరిష్టంగా 44 సంవత్సరాల లోపు ఉండాలి. ప్రభుత్వ నిబంధనల ప్రకారం అర్హులైన అభ్యర్థులకు వయోపరిమితిలో సడలింపులు కూడా వర్తిస్తాయి.
దరఖాస్తు తేదీలు , అధికారిక వెబ్సైట్
ఈ ఉద్యోగాలకు సంబంధించిన ఆన్లైన్ దరఖాస్తు ప్రక్రియ 15 జూలై 2026 నుండి ప్రారంభం కానుంది. అర్హత , ఆసక్తి గల అభ్యర్థులు 22 ఆగస్టు 2026 వరకు ఆన్లైన్లో దరఖాస్తులను సమర్పించడానికి గడువు ఇచ్చారు. ఈ రిక్రూట్మెంట్కు సంబంధించిన విద్యార్హతలు, పరీక్ష విధానం , ఇతర పూర్తి వివరాల కోసం అభ్యర్థులు కమిషన్ అధికారిక వెబ్సైట్ https://www.tgpsc.gov.in ను సందర్శించవచ్చు.
