కొత్తిమీరతో ఎన్నో లాభాలు.. కానీ అందరికీ కాదు!

మన వంటింట్లో కొత్తిమీరకు ఉన్న ప్రత్యేకత మరి దేనికీ ఉండదు. సాంబార్ అయినా, చికెన్ కర్రీ అయినా చివర్లో కాస్త కొత్తిమీర చల్లితేనే ఆ రుచే వేరు, దాని సువాసన తగిలితే చాలు భలే ఆకలి వేస్తుంది. అయితే కేవలం రుచి కోసమే కాకుండా, కొత్తిమీర వల్ల మన శరీరానికి బోలెడన్ని ఆయుర్వేద ప్రయోజనాలు ఉన్నాయి. కానీ, అదే సమయంలో కొందరు మాత్రం దీనికి దూరంగా ఉండాలని నిపుణులు చెబుతున్నారు. అసలు కొత్తిమీరతో వచ్చే లాభ నష్టాలేంటో ఇప్పుడు సింపుల్‌గా తెలుసుకుందాం..

కడుపు సమస్యలకు చెక్ పెడుతుంది: ధనియాల మొక్క నుంచి వచ్చే కొత్తిమీర అజీర్ణం, కడుపులో మంట, గ్యాస్ మరియు అజీర్ణ విరేచనాలు వంటి సమస్యలకు అద్భుతమైన ఔషధంగా పనిచేస్తుంది. ఇది మన జీర్ణవ్యవస్థను మెరుగుపరిచి, ఆకలిని పెంచుతుంది. ఇక ఆయుర్వేదం ప్రకారం ఇది శరీరంలోని మూడు దోషాలను అదుపులో ఉంచుతుంది. అలాగే, కొత్తిమీరను కషాయంగా చేసి పాలు, పంచదార కలిపి తీసుకుంటే బ్లీడింగ్ పైల్స్  సమస్య కూడా తగ్గుముఖం పడుతుంది.

కంటి సమస్యలు, నోటి పూతకు ఔషధం: పూర్వ కాలం నుండి కంటి సమస్యల నివారణకు కొత్తిమీరను ఎక్కువగా వాడేవారు. కొత్తిమీర ఆకులను ఆవునేతితో వేయించి కనురెప్పలపై వేసి కట్టినా లేదా కొద్దిగా వెచ్చచేసి కళ్లపై ఉంచినా నేత్ర రోగాలు తగ్గుతాయి. ఇక అలాగే నోరు పూసినప్పుడు కొత్తిమీర రసంతో నోటిని బాగా పుక్కిలిస్తే మంచి ఫలితం ఉంటుంది. దీనిని తరచూ వంటల్లో వాడటం వల్ల శరీరంలో వేడి తగ్గి, మూత్ర విసర్జన కూడా ఫ్రీగా జరుగుతుంది.

పైత్యాన్ని తగ్గించే టేస్టీ పచ్చడి: కొత్తిమీర ఆకులు, పచ్చిమిరపకాయలు, తగినంత ఉప్పు మరియు నిమ్మరసం కలిపి నూరిన పచ్చడి ఎంతో రుచిగా ఉండటమే కాకుండా.. శరీరంలోని పైత్యాన్ని బాగా తగ్గిస్తుంది. ఇక అంతేకాదు పురాతన కాలంలో కొన్ని తెగలవారు గర్భిణీ స్త్రీలు త్వరగా ప్రసవించడానికి వీలుగా వారి పక్కన కొత్తిమీరను ఉంచే ఒక నమ్మకం ఉండేది. ప్రసవం కాగానే దానిని అక్కడి నుంచి తీసేసేవారు.

వీరు మాత్రం దూరంగా ఉండాలి: కొత్తిమీరలో ఇన్ని రకాల హెల్త్ బెనిఫిట్స్ ఉన్నప్పటికీ, ఆయుర్వేద వైద్యుల ప్రకారం జీర్ణక్రియకు సంబంధించిన తీవ్రమైన లోపం ఉన్నవారు ఈ కొత్తిమీరను ఎట్టి పరిస్థితుల్లోనూ తీసుకోకూడదు. ఇది వారి సమస్యను మరింత ఎక్కువ చేసే ప్రమాదం ఉంది.

ఇక వంటల్లో సువాసనలు అద్దే కొత్తిమీర కేవలం గార్నిషింగ్ కోసమే కాదు, మన ఆరోగ్యాన్ని కాపాడే ఒక చక్కటి మూలిక. కాబట్టి రోజువారీ ఆహారంలో దీనిని పరిమితంగా వాడుకుంటూ ఆరోగ్యంగా ఉండండి.

గమనిక: పైన ఇచ్చిన సమాచారం కేవలం అవగాహన కోసం మాత్రమే, కొత్తిమీరను కంటి చికిత్సల కోసం లేదా కషాయాల రూపంలో ఔషధంగా వాడే ముందు, మీ శరీర తత్వాన్ని బట్టి ఒకసారి ఆయుర్వేద లేదా సాధారణ వైద్య నిపుణులను సంప్రదించి సలహా తీసుకోవడం చాలా ఉత్తమం.

The post కొత్తిమీరతో ఎన్నో లాభాలు.. కానీ అందరికీ కాదు! appeared first on Manalokam – Latest Telugu News & Updates.