సంచలనం సృష్టిస్తున్న ‘జననాయగన్’ మూవీ లీకేజీ వ్యవహారం ఇప్పుడు ఒక కొత్త మలుపు తిరిగింది. ఈ లీకేజీకి ఎడిటర్ ప్రదీప్ ఇ రాఘవ్ కారణమని వస్తున్న వార్తలను ఎడిటర్స్ యూనియన్ తీవ్రంగా ఖండించింది, ఈ మేరకు ఒక అధికారిక ప్రకటన విడుదల చేస్తూ, అసలు సినిమా కాపీ ఎక్కడ నుంచి బయటకు వచ్చి ఉండవచ్చనే దానిపై తమ అనుమానాలను వ్యక్తం చేసింది. ఎడిటర్స్ యూనియన్ వివరణ ప్రకారం, ఎడిటర్ ప్రదీప్కు ఈ లీకేజీతో ఎలాంటి సంబంధం లేదు. సెన్సార్ ప్రక్రియలో జాప్యం జరగడంతో, ఆ సమయాన్ని వాడుకుని సినిమాలో మరిన్ని మెరుగులు దిద్దాలని దర్శకుడు హెచ్. వినోద్ నిర్ణయించుకున్నారు.
Also Read :Trisha: నటి త్రిష ఇంటికి బాంబ్ బెదిరింపు.. బాంబ్ స్క్వాడ్స్ తనిఖీలు
జనవరి 14న కంప్యూటర్ గ్రాఫిక్స్ (CG), సౌండ్ మిక్సింగ్ పనులను మరింత ఉన్నతంగా తీర్చిదిద్దడం కోసం దర్శకుడు నిర్మాతల పూర్తి ఆమోదంతో సినిమా కాపీని పోస్ట్ ప్రొడక్షన్ పనుల కోసం హైదరాబాద్లోని అన్నపూర్ణ స్టూడియోస్కు పంపినట్లు యూనియన్ వెల్లడించింది. అక్కడ పనులు జరుగుతున్న సమయంలో అనేక మంది టెక్నీషియన్లు, విజువల్ ఎఫెక్ట్స్ నిపుణులు ఆ ఫుటేజీని యాక్సెస్ చేసే అవకాశం ఉందని, అందుకే లీకేజీ అక్కడే జరిగి ఉండవచ్చని యూనియన్ అనుమానిస్తోంది. ప్రదీప్ తన బాధ్యతలను సక్రమంగా నిర్వహించారని, అనవసరంగా ఆయనను నిందించవద్దని ఎడిటర్స్ యూనియన్ కోరింది. ఇక ప్రస్తుతం సైబర్ క్రైమ్ పోలీసులు ఈ కేసును విచారిస్తున్నారు. అన్నపూర్ణ స్టూడియోస్లో ఆ సమయంలో పనిచేసిన టెక్నీషియన్ల వివరాలను సేకరిస్తున్నట్లు సమాచారం. ఈ లీక్ వెనుక ఉన్న అసలు నిందితులు ఎవరో తెలిస్తే కానీ ‘జననాయగన్’ చిత్ర బృందానికి ఊరట లభించదు.