తరాజు

తరాజు

పితృసామ్యం నిన్ను అధిపతిగా మలచి నువ్వు

తరతరాల తక్కెడ తరాజులో

నన్నెప్పుడో తాలుగింజలా తేల్చేసావు

రెండు క్రోమోజోముల కలయిక నువ్వు నేను-

ఒక్క క్రోమోజము తేడాతో

నిర్మితమైన దేహాలు -నీది నాది

అంతమాత్రాన, నువ్వు ధీరుడు సూరుడు కాదు

నేను బేలనో అబలనో కాదు

నాకు బానిస ముద్ర వేసి ఉగ్గుపాలతోనే

భావ గరళం పోసారు

కానీ ఇప్పుడు ఆ బానిసత్వానికి

కాలం తీరిపోయింది

ఇప్పుడు నేనంటే,ఆత్మ గౌరవం ఆత్మవిశ్వాసం

ఇప్పుడు నేనంటే,ఆకాంక్ష అభివృద్ధి

ఇప్పుడిక సృష్టిలో సగం

సగం సగం కలిస్తేనే పూర్ణం

ఇప్పుడిక,సమానత్వపు తరాజులో

నువ్వు నేను కుడి ఎడమ కాదు

తేడానే లేని మనుషులం

– రోహిణి వంజారి