ఈ రోజుల్లో చాలా మంది ఇళ్లల్లో పిల్లలు అన్నం తినాలన్నా, అల్లరి చేయకుండా ఉండాలన్నా చేతిలో మొబైల్ ఫోన్ పెట్టడం ఒక అలవాటుగా మారిపోయింది. అయితే చిన్న వయసులోనే పిల్లలు మొబైల్ ఎక్కువగా వాడటం వల్ల వారి కంటి చూపు, శారీరక ఎదుగుదల, నిద్రపై తీవ్ర ప్రభావం పడుతుంది. ప్రపంచ ఆరోగ్య సంస్థ (WHO), అమెరికన్ అకాడమీ ఆఫ్ పీడియాట్రిక్స్ (AAP) వంటి అంతర్జాతీయ సంస్థలు పిల్లల స్క్రీన్ టైమ్ విషయంలో కొన్ని ముఖ్యమైన గైడ్లైన్స్ ఇచ్చాయి. ఆ వివరాలు ఏంటో ఇప్పుడు తెలుసుకుందాం.
రెండేళ్ల లోపు పిల్లలకు అసలు వద్దు: ప్రపంచ ఆరోగ్య సంస్థ సూచనల ప్రకారం రెండు సంవత్సరాల లోపు వయసున్న పిల్లలను మొబైల్, టీవీ మరియు టాబ్లెట్ వంటి స్క్రీన్లకు పూర్తిగా దూరంగా ఉంచడం ఎంతో ఉత్తమం. ఈ వయసులో వారికి ఫోన్లు అస్సలు అలవాటు చేయకూడదు. ఇక కేవలం దూరంగా ఉండే కుటుంబ సభ్యులతో మాట్లాడటానికి, కేవలం వీడియో కాల్స్ కోసం మాత్రమే చాలా తక్కువ సమయం అనుమతించవచ్చు.
2 నుండి 5 ఏళ్ల పిల్లలకు గంట చాలు: రెండు నుంచి ఐదేళ్ల లోపు వయసున్న పిల్లలు రోజుకు గరిష్టంగా 1 గంట కంటే ఎక్కువ సమయం స్క్రీన్ చూడకూడదు. ఆ చూసే ఒక్క గంట కూడా కేవలం మంచి ఎడ్యుకేషనల్ లేదా నాలెడ్జ్ పెంచే ప్రోగ్రామ్స్ మాత్రమే ఉండేలా చూసుకోవాలి. ఇక పిల్లలు ఫోన్ లో ఏం చూస్తున్నారో తల్లిదండ్రులు పక్కనే ఉండి నిరంతరం పర్యవేక్షించడం చాలా ముఖ్యం.
ఎక్కువ స్క్రీన్ టైమ్ వల్ల కలిగే నష్టాలు: చిన్న వయసులోనే గంటల తరబడి ఫోన్లు చూడటం వల్ల పిల్లల్లో భాష నేర్చుకోవడం ఆలస్యమవుతుంది. అలాగే వారిలో ఏకాగ్రత లోపించడం చికాకు పెరగడం వంటి మానసిక సమస్యలు వస్తాయి. ఇక దీనికి తోడు కళ్ళు మసకబారడం కంటి దురద తలనొప్పి వంటి కంటి సమస్యలు వస్తాయి. మొబైల్స్ నుండి వచ్చే బ్లూ లైట్ వల్ల పిల్లలు నిద్రలేమి సమస్యతో ఇబ్బంది పడతారు.
టైమర్లు పెట్టండి.. రూల్స్ మార్చండి: పిల్లల చేతికి ఫోన్ ఇచ్చే ముందే ఇంత సమయం మాత్రమే చూడాలి అని టైమర్లు పెట్టండి. ముఖ్యంగా భోజనం చేసేటప్పుడు మరియు రాత్రి పడుకోవడానికి గంట ముందు ఫోన్లు అస్సలు ఇవ్వకూడదు. ఇక బెడ్ రూమ్ లో మొబైల్స్ లేకుండా చూసుకోవడం మంచిది. ఇలాంటి చిన్న చిన్న రూల్స్ పెట్టడం వల్ల పిల్లలను ఫోన్లకు దూరం చేయవచ్చు.
బయట ఆటలను అలవాటు చేయండి: పిల్లలు ఇంట్లో కాస్త బోర్ ఫీల్ అవ్వగానే వారి చేతిలో ఫోన్ పెట్టేయకండి. దానికి బదులుగా ఇంట్లోని బొమ్మలతో ఆడుకోవడం, మంచి బొమ్మల పుస్తకాలు చదవడం లేదా సాయంత్రం పూట బయటకు తీసుకెళ్లి తోటి పిల్లలతో ఆటలు ఆడించడం అలవాటు చేయండి. ఇక దీనివల్ల వారి శారీరక ఎదుగుదల బాగుంటుంది మరియు క్రియేటివిటీ పెరుగుతుంది.
మొబైల్ ఫోన్లు పిల్లల భవిష్యత్తును, ఆరోగ్యాన్ని దెబ్బతీసే ప్రమాదం ఉంది. తల్లిదండ్రులుగా మనమే చొరవ తీసుకుని డిజిటల్ డిటాక్స్ పాటించాలి. మనం కూడా పిల్లల ముందు ఎక్కువ సమయం ఫోన్లతో గడపకుండా, వారితో కలిసి సమయాన్ని గడిపితే పిల్లలు కూడా మొబైల్స్ వైపు చూడకుండా ఆరోగ్యంగా ఎదుగుతారు.
గమనిక: మీ పిల్లల్లో మొబైల్ వాడకం వల్ల మాటలు ఆలస్యం అవ్వడం, పిలిచినా పలకకపోవడం లేదా కళ్లు ఎక్కువగా నలుపుకోవడం వంటి లక్షణాలు గమనిస్తే.. వెంటనే పీడియాట్రీషియన్ (పిల్లల డాక్టర్) లేదా ఐ స్పెషలిస్ట్ను సంప్రదించి పరీక్షలు చేయించడం మంచిది.
The post ఎర్లీ ఏజ్లో స్క్రీన్ టైమ్… జాగ్రత్త అవసరం appeared first on Manalokam – Latest Telugu News & Updates.