బన్నీ వాసు సొంత నిర్మాణంలో మొదలుపెట్టిన ‘ఇడుపు కాయితం’ సినిమా ఇప్పుడు ఒక వివాదానికి కేంద్ర బిందువుగా మారింది. సుకుమార్ రైటింగ్స్ సమర్పణలో ప్రియదర్శి హీరోగా, ఫోక్ డాన్సర్ నాగదుర్గ హీరోయిన్గా ఈ సినిమా రూపొందిస్తున్నట్లు ప్రకటించారు. అయితే, ‘ఇడుపు కాయితం’ అనే పేరు కొంచెం కొత్తగా అనిపించడంతో, అసలు ఈ పదానికి అర్థం ఏమిటి అనే చర్చ మొదలైంది. ఈ పదం తెలంగాణ పదజాలంలోనే ఉంది; కానీ, తెలంగాణలో కూడా కొంతమందికి అర్థం కాని విధంగా ఈ పదం ఉందనే చర్చ నడుస్తోంది.
దానికి తోడు, సోషల్ మీడియాలో ఎవరో ఆకతాయి “దీన్ని ఆంధ్ర భాషలోకి డబ్బింగ్ చేస్తారా?” అని ప్రశ్నించడంతో పెద్ద ఎత్తున వివాదం మొదలైంది. తెలంగాణ పదజాలం అంటే ఆంధ్ర వారికి చులకన అనే చర్చ కూడా తెరపైకి వచ్చింది. అయితే, దానికి కొంతమంది ఆంధ్ర వాళ్ళు స్పందిస్తూ… “నోటి దురద కొద్దీ అలా మాట్లాడిన కొంతమంది ఆంధ్ర వాళ్ళను మాత్రమే అనండి, అందరి ఆంధ్ర వాళ్ళను కలిపి అనాల్సిన అవసరం లేదు” అని అంటున్నారు.
అయితే, ఇంత వివాదానికి కారణమైన ఈ ‘ఇడుపు కాయితం’ అనే పదానికి అర్థం నిర్దిష్టంగా లేకపోయినా… విడాకులు తీసుకుంటున్నట్లుగా పెద్దల సమక్షంలో రాసుకున్న ఒక ఒప్పంద పత్రం అని చూచాయిగా చెప్పొచ్చు. చాలా తెలంగాణ పల్లెల్లో ఇప్పటికీ కోర్టుల ద్వారా పూర్తిస్థాయిలో విడాకులు జరగవు; కానీ, పెద్దల సమక్షంలో రాసుకున్న ‘ఇడుపు కాయితాలే’ వారికి విడాకుల పత్రాలుగా చలామణి అవుతూ ఉంటాయని తెలుస్తోంది. మొత్తంగా, ‘ఇడుపు కాయితం’ సినిమా షూటింగ్ కూడా మొదలుపెట్టకముందే సోషల్ మీడియాలో పెను చర్చకు దారి తీసిందని చెప్పొచ్చు.