ఏఐ, డిజిటల్ టెక్నాలజీ ఎంత పెరిగినా కొన్ని దేశాల్లో మతపరమైన అంశాలు, పత్రికా స్వేచ్ఛపై ఆంక్షలు ఏమాత్రం మారడం లేదు. పొరుగు దేశమైన పాకిస్తాన్లో తాజాగా ఇలాంటి ఒక సంచలన ఘటనే వెలుగులోకి వచ్చింది. ఆ దేశంలోనే అత్యంత ప్రజాదరణ పొందిన, అతిపెద్ద ప్రైవేట్ ఉర్దూ న్యూస్ ఛానెల్స్ ఒకటి అయిన ‘జియో న్యూస్’పై పాక్ ప్రభుత్వం ఊహించని రీతిలో కోరడా ఝుళిపించింది. మొహర్రం మాసం సందర్భంగా ప్రసారం చేసిన ఒక ప్రత్యేక డాక్యుమెంటరీ ప్రోగ్రామ్ వల్ల, దేశ సాంస్కృతిక, మతపరమైన భావాలు దెబ్బతిన్నాయనే నెపంతో ఈ ఛానెల్ ప్రసారాల లైసెన్స్ను పాకిస్తాన్ మీడియా రెగ్యులేటర్ 15 రోజుల పాటు సస్పెండ్ చేసింది.
పాకిస్తాన్ ఎలక్ట్రానిక్ మీడియా రెగ్యులేటరీ అథారిటీ శనివారం ఈ కఠినమైన ఉత్తర్వులను జారీ చేసింది. ‘సఫర్-ఎ-ఇష్క్’ పేరుతో జూన్ 26న ప్రసారమైన ఈ ప్రోగ్రామ్లో చూపించిన కొన్ని మతపరమైన విజువల్స్ పాకిస్తాన్ సామాజిక, మతపరమైన సున్నితత్వానికి విరుద్ధంగా ఉన్నాయని రెగ్యులేటర్ పేర్కొంది. ఈ ప్రసారం వల్ల వివిధ వర్గాల మధ్య మత సామరస్యం దెబ్బతినే ప్రమాదం ఉందని, శాంతిభద్రతలకు విఘాతం కలిగే అవకాశం ఉందని ఐటీ శాఖ లాంటి ఈ రెగ్యులేటరీ సంస్థ స్పష్టం చేసింది. అయితే ఆ డాక్యుమెంటరీలోని ఏ సీన్లు నిబంధనలను ఉల్లంఘించాయనే విషయాన్ని మాత్రం అధికారులు స్పష్టంగా వెల్లడించలేదు.
ఈ వివాదం చెలరేగడంతో కరాచీ ప్రధాన కేంద్రంగా పనిచేసే జియో న్యూస్ తక్షణమే స్పందించింది. తమ డిజిటల్ ప్లాట్ఫారమ్ల నుంచి ఆ ప్రోగ్రామ్ను పూర్తిగా తొలగించడమే కాకుండా, ప్రజలకు బహిరంగ క్షమాపణలు చెప్పింది. ఎడిటోరియల్ లోపం వల్లే ఈ తప్పు జరిగిందని ఛానెల్ యాజమాన్యం విచారం వ్యక్తం చేసింది. ఇరాక్, మధ్యప్రాచ్య దేశాల్లోని కొద్దిపాటి షియా ముస్లింలు ఆచరించే కొన్ని సంప్రదాయాలను, స్థానిక కట్టుబాట్లను చూపించడమే తమ ఉద్దేశమని.. అంతేకానీ ఎవరి మత విశ్వాసాలను తక్కువ చేయడం తమ ఉద్దేశం కాదని ఛానెల్ వివరణ ఇచ్చుకుంది. పాకిస్తాన్లో సున్నీ ముస్లింలు మెజారిటీగా ఉండగా, షియా ముస్లింలు కేవలం 10 శాతం మాత్రమే ఉన్నారు. ఇరాక్ తరహాలో మొహర్రం ఊరేగింపుల్లో ఇస్లామిక్ చారిత్రక పాత్రలను నాటకీయంగా ప్రదర్శించే పద్ధతులను పాక్లోని సున్నీ మత పెద్దలు తీవ్రంగా వ్యతిరేకిస్తుంటారు.
ALSO READ : ఇళ్లలోని పాత బంగారం అమ్మేస్తున్న జనం..
ఈ తాజా సస్పెన్షన్ పాకిస్తాన్లో నానాటికీ తగ్గిపోతున్న పత్రికా స్వేచ్ఛకు అద్దం పడుతోందని అంతర్జాతీయ సమాజం ఆందోళన వ్యక్తం చేస్తోంది. జర్నలిజంపై, స్వతంత్ర మీడియా సంస్థలపై పాక్ ప్రభుత్వం ఇలాంటి కఠినమైన ఆంక్షలు విధించడం ఇదే మొదటిసారి కాదు. ‘రిపోర్టర్స్ వితౌట్ బోర్డర్స్’ సంస్థ విడుదల చేసిన 2026 వరల్డ్ ప్రెస్ ఫ్రీడమ్ ఇండెక్స్ ప్రకారం.. ప్రపంచంలోని 180 దేశాలలో పాకిస్తాన్ అత్యంత దిగువన 153వ స్థానంలో నిలిచింది. పౌర-సైనిక అధికార సమతుల్యత ఉన్న ఆ దేశంలో మీడియా సంస్థలు నిరంతరం సెన్సార్షిప్, ప్రభుత్వ ఒత్తిడిలను ఎదుర్కొంటూనే ఉన్నాయి. సుమారు 1,500 మందికి పైగా ఉద్యోగులున్న జియో న్యూస్ లాంటి పెద్ద ఛానెల్పైనే 15 రోజుల నిషేధం విధించడం చట్టపరమైన, సామాజిక వర్గాల్లో తీవ్ర చర్చనీయాంశంగా మారింది.