అస్సాంలోని కామాఖ్య ఆలయం (Kamakhya Temple) భారతదేశంలోని అత్యంత ప్రసిద్ధ శక్తిపీఠాలలో ఒకటి. గౌహతి నగరంలోని నీలాచల్ కొండపై వెలసిన ఈ ఆలయం 51 శక్తిపీఠాలలో ప్రత్యేక స్థానం కలిగి ఉంది. పౌరాణిక విశ్వాసాల ప్రకారం, సతీదేవి యోని భాగం ఈ ప్రాంతంలో పడటంతో ఈ క్షేత్రం మహా శక్తిపీఠంగా ప్రసిద్ధి చెందింది. ఈ ఆలయంలో ఇతర దేవాలయాల మాదిరిగా దేవి విగ్రహం ఉండదు. గర్భగుడిలో యోని ఆకారంలో ఉన్న పవిత్ర శిలను పూజిస్తారు. ఆ శిల నుంచి నిరంతరం నీరు ప్రవహిస్తుండటం ఈ క్షేత్రం ప్రత్యేకత. భక్తులు ఈ పవిత్ర శిలను దర్శించి, ప్రవహించే జలాన్ని స్పర్శించి అమ్మవారి ఆశీస్సులు పొందుతారు.
అంబుబాచి మేళా ఎందుకు ప్రత్యేకం?
కామాఖ్య దేవాలయం దేశంలోనే అత్యంత విశిష్టమైన ఆధ్యాత్మిక సంప్రదాయానికి కేంద్రంగా నిలుస్తుంది. ప్రతి సంవత్సరం అమ్మవారికి ఋతుస్రావం జరుగుతుందని భక్తులు విశ్వసిస్తారు. ఈ సందర్భంగా నిర్వహించే అంబుబాచి మేళా ఎంతో వైభవంగా జరుగుతుంది.
ఈ ఏడాది అంబుబాచి మేళా జూన్ 22న ప్రారంభమవుతోంది. జూన్ 22 రాత్రి 9:08 గంటలకు ప్రత్యేక ‘ప్రవృత్తి’ క్రతువు నిర్వహించిన అనంతరం ఆలయ ద్వారాలు మూసివేస్తారు. ఆ తర్వాత మూడు రోజుల పాటు సాధారణ దర్శనాలు నిలిపివేస్తారు.
దేవత విశ్రాంతి తీసుకునే పవిత్ర కాలం
అమ్మవారు ఈ సమయంలో విశ్రాంతి తీసుకుంటారని భక్తుల విశ్వాసం. ఈ మూడు రోజుల కాలాన్ని ప్రకృతి తన సృజనశక్తిని పునరుద్ధరించుకునే సమయంగా కూడా భావిస్తారు. ఈ సందర్భంగా ఆలయ పూజారులు గర్భగుడిలోని పవిత్ర శిల సమీపంలో ఒక తెల్లని వస్త్రాన్ని ఉంచి ఆలయాన్ని మూసివేస్తారు.
స్థానిక విశ్వాసాల ప్రకారం, ఈ సమయంలో బ్రహ్మపుత్ర నది జలాలు కూడా ఎర్రటి వర్ణంలో కనిపిస్తాయని చెబుతారు. ఇది అమ్మవారి ఋతుచక్రానికి సంకేతంగా భావించబడుతుంది.
అంగోదక వస్త్రం ప్రసాదంగా
జూన్ 26 ఉదయం ‘నివృత్తి’ పూజ అనంతరం ఆలయ ద్వారాలు తిరిగి తెరవబడతాయి. అప్పటికి పవిత్ర శిల సమీపంలో ఉంచిన తెల్లని వస్త్రం ఎర్రటి రంగులోకి మారినట్లు విశ్వసిస్తారు. ఈ వస్త్రాన్ని “అంబుబాచి వస్త్రం” లేదా “అంగోదక వస్త్రం” అని పిలుస్తారు. ఈ పవిత్ర వస్త్రాన్ని భక్తులకు ప్రసాదంగా అందిస్తారు. దీనిని ఇంట్లో ఉంచుకుంటే శుభఫలితాలు, ఆధ్యాత్మిక రక్షణ, సానుకూల శక్తి లభిస్తాయని అనేక మంది నమ్ముతారు.
ప్రపంచం నలుమూలల నుంచి భక్తుల రాక
అంబుబాచి మేళా సందర్భంగా దేశ విదేశాల నుంచి లక్షలాది మంది భక్తులు, సాధువులు, తాంత్రికులు, యోగులు కామాఖ్య క్షేత్రానికి చేరుకుంటారు. ఈ కాలంలో చేసే జపం, తపస్సు, ధ్యానం, ఆధ్యాత్మిక సాధనలు విశేష ఫలితాలను ఇస్తాయని విశ్వాసం. అందుకే అంబుబాచి మేళా కేవలం ఒక మతపరమైన ఉత్సవం మాత్రమే కాదు. ఇది శక్తి ఆరాధన, ప్రకృతి చక్రాల పట్ల గౌరవం, స్త్రీత్వ మహిమ, ఆధ్యాత్మిక విశ్వాసాల అద్భుత సంగమంగా భావించబడుతుంది.
(Disclaimer: ఇక్కడ అందించిన సమాచారం మతం, సాధారణ నమ్మకాల ఆధారంగా మాత్రమే అందించబడింది. ఈ సమాచారం ఖచ్చితంగా నిజం లేదా శాస్త్రీయంగా నిర్ధారితమైన సమాచారం అని భావించకండి. వ్యక్తిగత నిర్ణయాలు తీసుకునే ముందు సంబంధిత నిపుణులను సంప్రదించడం మంచిది.)