NEET UG 2026 రీ-ఎగ్జామినేషన్ను పారదర్శకంగా, సురక్షితంగా నిర్వహించేందుకు నేషనల్ టెస్టింగ్ ఏజెన్సీ (NTA) శనివారం (నేడు) దేశవ్యాప్తంగా ప్రత్యేక మాక్ డ్రిల్ నిర్వహిస్తోంది. పరీక్షా కేంద్రాల్లో భద్రతా ఏర్పాట్లు, అభ్యర్థుల ప్రవేశ ప్రక్రియ, పరీక్ష నిర్వహణ వ్యవస్థలను పరీక్షించేందుకు ఈ డ్రిల్ చేపడుతోంది.
NTA విడుదల చేసిన తాజా ప్రకటన ప్రకారం, NEET (UG) 2026 రీ-ఎగ్జామినేషన్ జూన్ 21, ఆదివారం మధ్యాహ్నం 2:00 గంటల నుంచి సాయంత్రం 5:15 గంటల వరకు పెన్-అండ్-పేపర్ విధానంలో జరుగుతుంది. వికలాంగుల (PwD/PwBD) కేటగిరీకి చెందిన అభ్యర్థులకు అదనపు సమయం కల్పించబడగా, వారు సాయంత్రం 6:20 గంటల వరకు పరీక్ష రాయడానికి అనుమతిస్తారు.
దేశంలోని 551 నగరాలు, విదేశాల్లోని 14 నగరాల్లో నిర్వహించే ఈ పరీక్షకు సుమారు 22.79 లక్షల మంది అభ్యర్థులు హాజరుకానున్నారు.
ఎగ్జామ్ సెంటర్కు ఎప్పుడు చేరుకోవాలి?
అభ్యర్థులు తమ పరీక్షా కేంద్రాలకు ఉదయం 11:00 గంటల నుంచి మధ్యాహ్నం 1:30 గంటల మధ్య చేరుకోవాలని NTA సూచించింది.
- మధ్యాహ్నం 1:30 గంటలకు గేట్లు మూసివేస్తారు.
- ఆ తర్వాత ఎట్టి పరిస్థితుల్లోనూ ప్రవేశం ఉండదు.
- మతపరమైన లేదా సంప్రదాయ దుస్తులు ధరించే వారు, ఫుల్ స్లీవ్స్ లేదా ఉన్ని దుస్తులు వేసుకునే వారు ముందుగానే రావాలని సూచించారు.
- అడ్మిట్ కార్డులో ఉన్న కేంద్రం చిరునామాను తప్పనిసరిగా ధృవీకరించుకోవాలి.
- కొన్ని కేంద్రాల విషయంలో మ్యాప్ యాప్లు తప్పుదారి పట్టించే అవకాశం ఉన్నందున వాటిపైనే పూర్తిగా ఆధారపడవద్దని హెచ్చరించింది.
NEET అభ్యర్థుల కోసం ప్రత్యేక రైళ్లు, మెట్రో సేవలు
- పరీక్ష రాసే విద్యార్థుల సౌకర్యార్థం దక్షిణ తూర్పు రైల్వే (South Eastern Railway) ప్రత్యేక రైలును నడపనుంది.
- స్పెషల్ ట్రైన్ నంబర్ 68044: రూర్కెలా నుంచి ఉదయం 5:10 గంటలకు బయలుదేరి.. టాటానగర్కు ఉదయం 9:20 గంటలకు చేరుకుంటుంది.
- ఇక కోల్కతా మెట్రో కూడా జూన్ 21న సాధారణ సమయానికి దాదాపు ఐదు గంటల ముందుగానే, అంటే ఉదయం 4 గంటల నుంచే మూడు కారిడార్లలో సేవలు ప్రారంభించనుంది. అంతర్జాతీయ యోగా దినోత్సవ కార్యక్రమాలతో పాటు NEET అభ్యర్థులు, వారి తల్లిదండ్రుల రాకపోకలను దృష్టిలో పెట్టుకుని ఈ నిర్ణయం తీసుకుంది.
అడ్మిట్ కార్డ్పై NTA స్పష్టత
NTA సోషల్ మీడియా వేదిక X ద్వారా కీలక ప్రకటన చేసింది.
- జూన్ 21 NEET UG పరీక్ష కోసం ఇప్పటికే కొత్త అడ్మిట్ కార్డ్ డౌన్లోడ్ చేసుకున్న విద్యార్థులు మళ్లీ డౌన్లోడ్ చేయాల్సిన అవసరం లేదు.
- SMS, Email, WhatsApp ద్వారా పంపుతున్న సందేశాలు ఇంకా కొత్త అడ్మిట్ కార్డ్ డౌన్లోడ్ చేయని విద్యార్థుల కోసం మాత్రమే.
- మే 3న జారీ చేసిన పాత అడ్మిట్ కార్డులు చెల్లవు.
- అనేక మంది అభ్యర్థులకు వారి ప్రాధాన్య నగరాల్లో కొత్త పరీక్షా కేంద్రాలు కేటాయించినందున జూన్ 21 అడ్మిట్ కార్డునే ఉపయోగించాలి.
- కొత్త అడ్మిట్ కార్డును ఒకసారి డౌన్లోడ్ చేసి ప్రింట్ తీసుకుంటే సరిపోతుందని NTA తెలిపింది.
అభ్యర్థులకు ముఖ్య సూచనలు
- ఉదయం 11 గంటలకే పరీక్షా కేంద్రానికి చేరుకోవడం మంచిది.
- అడ్మిట్ కార్డ్, ఫోటో ఐడీ తప్పనిసరిగా వెంట తీసుకెళ్లాలి.
- 1:30 గంటల తర్వాత ప్రవేశం ఉండదు.
- పాత అడ్మిట్ కార్డ్ ఉపయోగించరాదు.
- కేంద్రం చిరునామాను ముందుగానే పరిశీలించుకోవాలి.
- భద్రతా తనిఖీలకు సహకరించాలి.