డిజిటల్ పేమెంట్స్ యాప్స్ వాడుతున్న యూజర్లకు ఫోన్పే తాజాగా ఒక హెచ్చరిక జారీ చేసింది. వరుసగా 365 రోజుల పాటు ఎటువంటి లావాదేవీలు జరపని వాలెట్ ఖాతాలకు జరిమానా తప్పదు. ఈ ఛార్జీల బారిన పడకుండా ఉండాలంటే మీరు ఏం చేయాలి? అసలు ఈ నిబంధన ఎవరికి వర్తిస్తుంది? ఫోన్పే వాలెట్ మెయింటెనెన్స్ ఫీజుకు సంబంధించి తెలుసుకోవాల్సిన విషయాలేంటో చూద్దాం..
ఫోన్పే కొత్త రూల్
ఫోన్పే తన తాజా పాలసీ అప్డేట్లో భాగంగా, నిష్క్రియంగా ఉన్న వాలెట్లపై రూ. 100 త్రైమాసిక మెయింటెనెన్స్ ఫీజును విధిస్తున్నట్లు ప్రకటించింది. ఒక వినియోగదారుడు తన ఫోన్పే వాలెట్ ద్వారా ఏడాది పాటు ఎలాంటి ఆర్థిక లావాదేవీలు చేయకపోతే, ఆ వాలెట్ను ‘ఇన్-యాక్టివ్’గా పరిగణిస్తారు. ప్లాట్ఫారమ్ మెరుగుదలలు మరియు భద్రతా ప్రమాణాలను నిర్వహించడం కోసమే ఈ ఫీజును వసూలు చేస్తున్నామని కంపెనీ పేర్కొంది.
ఏ లావాదేవీలు పరిగణనలోకి రావు?
చాలామంది యూజర్లు కేవలం యాప్లో లాగిన్ అవ్వడం లేదా బ్యాంక్ ఖాతా నుంచి నేరుగా యూపీఐ (UPI) లావాదేవీలు చేయడం వల్ల వాలెట్ యాక్టివ్గా ఉంటుందని భావిస్తారు. కానీ ఫోన్పే నిబంధనల ప్రకారం, నేరుగా బ్యాంక్ ద్వారా చేసే యూపీఐ పేమెంట్లు వాలెట్ యాక్టివిటీ కిందకు రావు. వాలెట్ యాక్టివ్గా ఉండాలంటే, ఖచ్చితంగా మీ ‘వాలెట్ బ్యాలెన్స్’ ఉపయోగించి ఏదైనా ఒక చిన్న లావాదేవీ (రీఛార్జ్ లేదా బిల్ పేమెంట్) చేయాల్సి ఉంటుంది.
డబ్బులు ఎలా కట్ అవుతాయి?
- మీ వాలెట్ ఇన్-యాక్టివ్ లిస్ట్లోకి వెళ్తే, కంపెనీ 15 రోజుల ముందస్తు నోటీసు పంపుతుంది. ఆ సమయంలో మీరు ఏదైనా వాలెట్ లావాదేవీ చేస్తే ఛార్జ్ పడదు.
- ఎటువంటి స్పందన లేకపోతే, మీ వాలెట్ బ్యాలెన్స్ నుంచి రూ. 100 ఆటోమేటిక్గా కట్ అవుతుంది.
- ఒకవేళ వాలెట్లో రూ. 100 కంటే తక్కువ ఉంటే, ఉన్న మొత్తం కట్ అయి వాలెట్ బ్యాలెన్స్ ‘సున్నా’ అవుతుంది. మీ బ్యాంక్ ఖాతా నుండి అదనంగా డబ్బులు కట్ అవ్వవు మరియు బ్యాలెన్స్ మైనస్లోకి వెళ్లదు.
పెనాల్టీ పడకుండా ఏం చేయాలి?
- చిన్న ట్రాన్సాక్షన్: ఏడాది పూర్తయ్యేలోపు వాలెట్ బ్యాలెన్స్ ఉపయోగించి కనీసం ఒక రూపాయి రీఛార్జ్ చేయండి.
- వాలెట్ క్లోజ్ చేయడం: మీకు వాలెట్ అవసరం లేకపోతే, యాప్లో సెట్టింగ్స్లోకి వెళ్లి వాలెట్ను శాశ్వతంగా డిలీట్ చేసుకోండి. అప్పుడు అందులో మిగిలిన డబ్బు మీ బ్యాంక్ ఖాతాకు జమ అవుతుంది.
- నోటిఫికేషన్లు గమనించండి: ఫోన్పే నుంచి వచ్చే SMS లేదా నోటిఫికేషన్లను ఎప్పటికప్పుడు చెక్ చేస్తూ ఉండండి.
గుర్తుంచుకోండి, ఈ రూల్ కేవలం ‘వాలెట్’కు మాత్రమే. మీరు సాధారణంగా చేసే యూపీఐ ట్రాన్సాక్షన్లు యథావిధిగా ఉచితంగానే కొనసాగుతాయి! కాబట్టి కంగారు పడాల్సిన పనిలేదు, మీ వాలెట్ హిస్టరీ ఒక్కసారి చూసుకోండి.