భారత మార్కెట్లో 125cc కమ్యూటర్ బైక్లకు రోజురోజుకు డిమాండ్ పెరుగుతోంది. ఈ విభాగంలో హోండా SP 125, TVS రైడర్ 125 అత్యంత ప్రజాదరణ పొందిన మోడళ్లుగా నిలిచాయి. ఇటీవల ఈ రెండు బైక్లు కొత్త అప్డేట్లను పొందడంతో వినియోగదారుల్లో ఆసక్తి మరింత పెరిగింది. హోండా SP 125 మెరుగైన మైలేజ్, నమ్మకమైన పనితీరుతో ఆకట్టుకుంటే, TVS రైడర్ 125 అధునాతన ఫీచర్లు, ABS, రైడింగ్ మోడ్లతో యువతను ఆకర్షిస్తోంది. మరి ఈ రెండు బైక్లలో ఏది మీకు సరైన ఎంపికో తెలుసుకుందాం.
ధరలో ఎవరు ముందున్నారు?
హోండా SP 125 ఎక్స్-షోరూమ్ ధర రూ.88,528 నుంచి రూ.96,116 వరకు ఉంది. మరోవైపు TVS రైడర్ 125 ధర రూ.82,860 నుంచి ప్రారంభమవుతుంది. ధర పరంగా చూస్తే TVS రైడర్ 125 కొంత చౌకైన ఎంపికగా నిలుస్తుంది.
భద్రతలో ఏది బెస్ట్?
భద్రత విషయంలో TVS రైడర్ 125కు స్పష్టమైన ఆధిక్యం ఉంది. టాప్ వేరియంట్లలో ABS (యాంటీ-లాక్ బ్రేకింగ్ సిస్టమ్), డ్యూయల్ డిస్క్ బ్రేక్లు అందుబాటులో ఉన్నాయి. హోండా SP 125లో ABS అందుబాటులో లేదు. అయితే కంబైన్డ్ బ్రేకింగ్ సిస్టమ్ (CBS) ఫీచర్ను కంపెనీ అందిస్తోంది.
ఇంజిన్, పనితీరు
హోండా SP 125లో 123.94cc PGM-FI ఇంజిన్ ఉంది. ఇది మెరుగైన ఇంధన సామర్థ్యం, సాఫీ పనితీరుకు ప్రసిద్ధి చెందింది.
TVS రైడర్ 125లో 125cc, 3-వాల్వ్, ఎయిర్-అండ్-ఆయిల్ కూల్డ్ ఇంజిన్ ఉంది. ఇది 11.75 Nm టార్క్ను ఉత్పత్తి చేస్తుంది. కంపెనీ ప్రకారం ABS వేరియంట్ 0 నుంచి 60 kmph వేగాన్ని కేవలం 5.8 సెకన్లలో అందుకుంటుంది.
మైలేజీలో
మైలేజ్ విషయంలో హోండా SP 125 ముందంజలో ఉంది. కంపెనీ ప్రకారం ఈ బైక్ లీటరుకు 63 కిలోమీటర్ల వరకు మైలేజ్ ఇస్తుంది.
TVS రైడర్ 125 ARAI సర్టిఫైడ్ మైలేజ్ సుమారు 56.7 kmplగా ఉంది. అయితే ఇందులో బూస్ట్, పవర్, ఎకో రైడింగ్ మోడ్లు ఉండటంతో అవసరానికి అనుగుణంగా పనితీరు, మైలేజీని సమతుల్యం చేసుకోవచ్చు.
ఫీచర్లలో TVS రైడర్ ఆధిపత్యం
హోండా SP 125 టాప్ వేరియంట్లో TFT డిస్ప్లే, Honda RoadSync కనెక్టివిటీ, ఐడ్లింగ్ స్టాప్ సిస్టమ్, USB Type-C ఛార్జింగ్ పోర్ట్ వంటి ఫీచర్లు ఉన్నాయి.
TVS రైడర్ 125లో SmartXonnect టెక్నాలజీ, నావిగేషన్, కాల్ అలర్ట్స్, వాయిస్ అసిస్ట్, కనెక్టెడ్ ఫీచర్లు అందుబాటులో ఉన్నాయి. అలాగే సెగ్మెంట్లోనే ప్రత్యేకమైన Glide Through Traffic (GTT) ఫీచర్ కూడా ఉంది.
ఏ బైక్ కొనాలి?
మీ ప్రాధాన్యత అధిక మైలేజ్, విశ్వసనీయత, తక్కువ నిర్వహణ ఖర్చు అయితే హోండా SP 125 ఉత్తమ ఎంపిక. అయితే ABS, అధునాతన ఫీచర్లు, స్పోర్టీ డిజైన్, మెరుగైన పనితీరు కోరుకునే వారికి TVS రైడర్ 125 మరింత విలువైన ప్యాకేజీగా నిలుస్తుంది. సంక్షిప్తంగా చెప్పాలంటే, మైలేజీలో హోండా SP 125 విజేత కాగా, ఫీచర్లు, భద్రతలో TVS రైడర్ 125 ముందంజలో ఉంది.