తిరువనంతపురం: కుంభమేళా వైరల్ గర్ల్ మోనాలిసాకు కేరళ హైకోర్టులో భారీ ఊరట దక్కింది. మోనాలిసాకు రక్షణ కల్పించాలని న్యాయస్థానం పోలీసులను ఆదేశించింది. ఈ మేరకు రాష్ట్ర ప్రభుత్వానికి, ఎర్నాకులం ఎస్హెచ్ఓకు కోర్టు ఆదేశాలు జారీ చేసింది.
అసలేం జరిగిందంటే..?
ప్రయాగ్ రాజ్ కుంభమేళాలో పూసలు అమ్ముతూ తన క్యూట్ లుక్స్తో ఓవర్ నైట్ స్టార్గా మారిన మోనాలిసా తన ప్రియుడు ఫర్మాన్ ఖాన్ను లవ్ మ్యారేజ్ చేసుకున్న విషయం తెలిసిందే. అయితే, తన కూతురు మైనర్ అని.. ఫర్మాన్ ఆమెను ప్రలోభ పెట్టి పెళ్లి చేసుకున్నాడని మోనాలిసా తల్లిదండ్రులు మధ్యప్రదేశ్ పోలీసులకు ఫిర్యాదు చేశారు. మోనాలిసా పేరెంట్స్ ఫిర్యాదు మేరకు ఫర్మాన్ ఖాన్పై పోలీసులు కిడ్నాప్ కేసు నమోదు చేశారు. ఈ క్రమంలో మోనాలిసా దంపతులు కేరళ హైకోర్టును ఆశ్రయించారు.
తమను చంపేస్తామని కొందరు ఫోన్లలో బెదిరిస్తున్నారని.. మాకు రక్షణ కల్పించాలని పిటిషన్ దాఖలు చేశారు. ఈ పిటిషన్ పై విచారణ చేపట్టిన హైకోర్టు.. శనివారం (జూన్ 20) కీలక తీర్పు వెలువరించింది. మోనాలిసా అభ్యర్థనతో ఏకీభవించిన న్యాయస్థానం.. ఆమెకు రక్షణ కల్పించాలని కేరళ ప్రభుత్వాన్ని, పోలీసులను ఆదేశించింది. అనంతరం ఈ కేసు తదుపరి విచారణను జూలై 10వ తేదీకి కోర్టు వాయిదా వేసింది.