- భారత్, చైనా సహా ఐదు దేశాలకు పన్నుల ముప్పు
- రష్యా, ఇరాన్పై ఆంక్షలు.. అమెరికా అధ్యక్షుడికి అపరిమిత అధికారాలు
వాషింగ్టన్: ఉక్రెయిన్పై సైనిక చర్యను కొనసాగిస్తున్న రష్యా ఆర్థిక మూలాలను దెబ్బతీసేందుకు అమెరికా సెనేట్ సంచలన నిర్ణయం తీసుకున్నది. రష్యా నుంచి పెట్రోలియం ఉత్పత్తులను అత్యధికంగా కొనుగోలు చేస్తున్న భారత్, చైనాతో సహా ఐదు దేశాలపై 100 శాతం టారిఫ్లు విధించేందుకు వీలు కల్పించే బిల్లుకు ఆమోదం తెలిపింది. ‘లిండ్సే ఓ.గ్రాహం శాంక్షనింగ్ రష్యా అండ్ ఇరాన్ యాక్ట్ ఆఫ్ 2026’గా నామకరణం చేసిన ఈ బిల్లుకు ప్రతినిధుల సభలో 86-–11 ఓట్ల భారీ మెజారిటీతో ఆమోదం లభించింది.
రిపబ్లికన్ సెనేటర్ లిండ్సే గ్రాహం, డెమొక్రాట్ సెనేటర్ రిచర్డ్ బ్లూమెంతల్ కలిసి ఈ ద్వైపాక్షిక బిల్లును రూపొందించారు. ఇటీవల జులై 11న లిండ్సే గ్రాహం అకస్మాత్తుగా కన్నుమూశారు. ఉక్రెయిన్కు బలమైన మద్దతుదారుడైన గ్రాహం స్మారకార్థం ఈ బిల్లుకు పేరుపెట్టి.. సభలో ఆమోదించుకున్నారు. ‘‘అమెరికాతో వ్యాపారం చేస్తారా? లేక రష్యా నుంచి చౌకగా లభించే ఇంధనాన్ని కొంటారా? అనే సరళమైన, స్పష్టమైన విషయాన్ని ఈ చట్టం సంబంధిత దేశాల ముందర ఉంచుతోంది” అని గ్రాహం సోదరి, నూతన సెనేటర్ డార్లిన్ గ్రాహం వెల్లడించారు.
అధ్యక్షుడి అధికారాలపై విమర్శలు
ఈ బిల్లు రష్యాను శిక్షించడం కంటే అధ్యక్షుడు డొనాల్డ్ ట్రంప్కు టారిఫ్ల రూపంలో అపరిమితమైన అధికారాలను కట్టబెడుతోందని డెమొక్రటిక్ నాయకులు గ్రెగొరీ మీక్స్, డాన్ బెయర్ ఆందోళన వ్యక్తం చేశారు. గతంలోనూ వర్తక యుద్ధాల పేరుతో ట్రంప్ పన్నులను ఆయుధంగా వాడుకున్నారని, దీనివల్ల అమెరికా ప్రజలపైనే భారం పడుతుందని వారు అభిప్రాయపడ్డారు. కాగా, ఈ బిల్లు తదుపరి ఆమోదం కోసం ఆగస్టు 31న సమావేశమయ్యే అమెరికా ‘హౌస్ ఆఫ్ రిప్రజెంటేటివ్స్’ ముందుకు వెళ్లనుంది. అక్కడ కూడా ఆమోదం పొందితే భారత్పై ఈ టారిఫ్ల ప్రభావం పడే అవకాశం ఉంది.