MLC 2026 : అమెరికాలో జరుగుతున్న మేజర్ లీగ్ క్రికెట్లో సిక్సర్ల పండగ మొదలైంది. టోర్నమెంట్లో భాగంగా జరిగిన ఆరో మ్యాచ్లో లాస్ ఏంజిల్స్ నైట్ రైడర్స్ (LAKR), సీయాటిల్ ఓర్కాస్ జట్లు తలపడ్డాయి. ఈ మ్యాచ్లో నైట్ రైడర్స్ ఆల్రౌండర్, వెస్టిండీస్ స్టార్ హిట్టర్ రోవ్మన్ పావెల్ బ్యాట్తో శివతాండవం చేశాడు. సీయాటిల్ ఓర్కాస్ బౌలింగ్ దాడిని పూర్తిగా ముక్కలు చేస్తూ.. ముఖ్యంగా లంక మీడియం పేసర్ దసున్ శనక వేసిన ఓవర్లో బౌండరీల వర్షం కురిపించాడు.
నైట్ రైడర్స్ ఇన్నింగ్స్ 17వ ఓవర్ ప్రారంభమయ్యే సమయానికి జట్టు 5 వికెట్ల నష్టానికి 138 పరుగులు చేసి కొద్దిగా ఇబ్బందుల్లో ఉంది. గౌరవప్రదమైన స్కోరు సాధించాలంటే వేగంగా పరుగులు రాబట్టాల్సిన పరిస్థితి. ఈ సమయంలో బౌలింగ్కు వచ్చిన దసున్ శనకపై రోవ్మన్ పావెల్ లయబద్ధంగా విరుచుకుపడ్డాడు. శనక వేసిన మొదటి స్లో బాల్ను డీప్ మిడ్-వికెట్ మీదుగా భారీ సిక్సర్గా మలిచాడు. ఆ తర్వాత బౌలర్ రౌండ్ ద వికెట్ వచ్చి లైన్ మార్చినా ఫలితం లేకుండా పోయింది. పావెల్ వరుసగా తర్వాతి నాలుగు బంతులను కూడా స్టేడియం వెలుపలికి పంపిస్తూ వరుసగా 5 సిక్సర్లు బాదాడు.
మొదటి ఐదు బంతుల్లో 5 సిక్సర్లతో 30 పరుగులు రావడంతో.. క్రికెట్ చరిత్రలో ఒకే ఓవర్లో 6 సిక్సర్లు కొట్టిన బ్యాటర్ల సరసన పావెల్ నిలుస్తాడని అంతా ఆశగా ఎదురుచూశారు. ఆరో బంతిని కూడా సిక్సర్గా మార్చడానికి పావెల్ ప్రయత్నించాడు కానీ టైమింగ్ కుదరలేదు. దీంతో ఆఖరి బంతికి శనక వికెట్ తీసి ఊపిరి పీల్చుకున్నాడు. శనకకు ఆఖరి బంతికి వికెట్ దక్కినప్పటికీ.. అప్పటికే జరగాల్సిన నష్టం జరిగిపోయింది. ఒకే ఓవర్లో 30 పరుగులు సమర్పించుకుని అతను భారీగా మూల్యం చెల్లించుకున్నాడు. పావెల్ కేవలం 11 బంతుల్లో 37 పరుగులు చేసి నైట్ రైడర్స్ స్కోరును పెంచాడు.
పావెల్ (37) మెరుపులతో పాటు జేసన్ హోల్డర్ (14 బంతుల్లో 23) రాణించడంతో లాస్ ఏంజిల్స్ నైట్ రైడర్స్ నిర్ణీత ఓవర్లలో 196 పరుగుల భారీ స్కోరు సాధించింది. అంతకుముందు ఓపెనర్లు కొలిన్ మున్రో, ఆండ్రీ ఫ్లెచర్ కూడా జట్టుకు వేగవంతమైన భాగస్వామ్యాన్ని అందించారు. అనంతరం 197 పరుగుల భారీ లక్ష్యంతో బరిలోకి దిగిన సీయాటిల్ ఓర్కాస్ జట్టు.. నైట్ రైడర్స్ బౌలర్ల ధాటికి తట్టుకోలేకపోయింది. క్రమం తప్పకుండా వికెట్లు కోల్పోతూ కేవలం 16 ఓవర్లలోనే 115 పరుగులకు ఆలౌట్ అయింది. దీనితో నైట్ రైడర్స్ 81 పరుగుల భారీ తేడాతో ఘన విజయం సాధించి పాయింట్ల పట్టికలో అగ్రస్థానానికి చేరుకుంది.
We promise there was a fifth one too.
Rovman Powell | #SOvLAKR | #WeAreLAKR | #LAKnightRiders | #MLC26 pic.twitter.com/WQF9eORvd2
— Los Angeles Knight Riders (@LA_KnightRiders) June 21, 2026
రోవ్మన్ పావెల్ ఈ ఏడాది (2026)లో టీ20 ఫార్మాట్లో అత్యంత భీకరమైన ఫామ్లో ఉన్నాడు. ఇటీవల ముగిసిన ఐపీఎల్ 2026 సీజన్లో కోల్కతా నైట్ రైడర్స్ (KKR) తరఫున ఆడిన పావెల్.. లోయర్ ఆర్డర్లో వచ్చి ఎన్నో కీలక ఇన్నింగ్స్లు ఆడి జట్టు విజయాల్లో భాగమయ్యాడు. అలాగే ఈ ఏడాది వెస్టిండీస్ తరఫున ఆడిన 13 అంతర్జాతీయ టీ20 మ్యాచ్ల్లో 139 స్ట్రైక్ రేట్తో 279 పరుగులు చేశాడు. ఇప్పుడు అదే ఫామ్ను అమెరికా లీగ్లోనూ కొనసాగిస్తూ.. నైట్ రైడర్స్ జట్టును ముందుండి నడిపిస్తున్నాడు.
మరిన్ని క్రికెట్ వార్తల కోసం ఇక్కడ క్లిక్ చేయండి