Droupadi Murmu: సుప్రీంకోర్టు న్యాయమూర్తుల సంఖ్యను పెంచుతూ కేంద్ర ప్రభుత్వం తీసుకున్న నిర్ణయానికి రాష్ట్రపతి ద్రౌపది ముర్ము ఆమోదం తెలిపినట్లు కేంద్ర న్యాయశాఖ మంత్రి అర్జున్ రామ్ మేఘ్వాల్ ఆదివారం ప్రకటించారు. ఈ తాజా నిర్ణయంతో సుప్రీంకోర్టులో ప్రధాన న్యాయమూర్తి (CJI) కాకుండా న్యాయమూర్తుల సంఖ్య ప్రస్తుతమున్న 33 నుంచి 37కి పెరగనుంది. అంటే చీఫ్ జస్టిస్తో కలిపి మొత్తం న్యాయమూర్తుల సంఖ్య 34 నుంచి 38కి చేరుకుంటుంది. ఈ మేరకు “సుప్రీంకోర్టు (న్యాయమూర్తుల సంఖ్య) సవరణ ఆర్డినెన్స్, 2026″ను రాష్ట్రపతి జారీ చేశారని, ఇది 1956 నాటి మూల చట్టాన్ని సవరిస్తుందని మంత్రి మేఘ్వాల్ తన ఎక్స్ (ట్విట్టర్) పోస్ట్లో పేర్కొన్నారు. అంతకుముందు మే 5న ప్రధానమంత్రి నరేంద్ర మోడీ అధ్యక్షతన జరిగిన కేంద్ర క్యాబినెట్ సమావేశం ఈ సంఖ్యను 4 పెంచే ప్రతిపాదనకు ఆమోదం తెలిపింది. దేశ అత్యున్నత న్యాయస్థానంలో గుట్టలుగా పేరుకుపోతున్న కేసులు, పెరుగుతున్న వ్యాజ్యాలను వేగంగా పరిష్కరించడానికి ఇదొక సకాలంలో తీసుకున్న చర్యగా న్యాయవ్యవస్థకు చెందిన ప్రముఖులు దీనిని విస్తృతంగా స్వాగతిస్తున్నారు.
సుప్రీంకోర్టు బార్ అసోసియేషన్ ప్రెసిడెంట్, సీనియర్ అడ్వకేట్ వికాస్ సింగ్ ఈ అంశంపై మాట్లాడుతూ.. కోర్టులో కొత్త కేసులు దాఖలవుతున్న రేటు నిరంతరం పెరుగుతున్నందున, జడ్జీల సంఖ్యను పెంచాలనే డిమాండ్ చాలా కాలంగా ఉందని గుర్తుచేశారు. ప్రస్తుత న్యాయమూర్తుల కేసుల పరిష్కార రేటు అభినందనీయంగా ఉన్నప్పటికీ, విపరీతమైన కేసుల భారం వల్ల మరింత మంది న్యాయమూర్తులు అవసరమని అభిప్రాయపడ్డారు. దీనికి తగ్గట్టుగానే మౌలిక సదుపాయాలు సైతం పెరగాలని, ఈ ఏడాది చివరి నాటికి సుప్రీంకోర్టు నూతన భవనంలో కొంత భాగం అందుబాటులోకి వస్తుందని ఆశిస్తున్నట్లు తెలిపారు. కొత్త భవనం వస్తే 38 మంది జడ్జీలకు సౌకర్యవంతంగా వసతి కల్పించవచ్చని, రాబోయే రోజుల్లో మొత్తం భవనం పూర్తయితే దాదాపు 50 మంది న్యాయమూర్తులు అవసరమవుతారని పేర్కొన్నారు.