వెండితెర వెనుక వందలాది మంది హీరోయిన్లకు తన గొంతుతో ప్రాణం పోసి, స్టేజ్ పై ఎప్పుడూ చిరునవ్వుతో కనిపించే సింగర్ సునీత జీవితంలో అంతకుమించిన చీకటి కోణాలు ఉన్నాయని తాజాగా ఆమె వెల్లడించారు. తాను ఎన్నో ఏళ్ల పాటు తీవ్రమైన Depressionకు లోనయ్యానని, ఆ ఒత్తిడి వల్లే తనకు ‘క్రాన్స్’ అనే భయంకరమైన ఆటో ఇమ్యూన్ డిసీజ్ వచ్చిందని మొదటిసారి బయటపెట్టారు.
ఇంటర్వ్యూలో తన అనారోగ్యం గురించి మాట్లాడుతూ.. “సక్సెస్, డబ్బు, పేరు ఉంటేనే లైఫ్ అనుకుంటారు, కానీ అది కాదు. నేను నా పిల్లల కోసం ఎన్నో కష్టాలు పడ్డాను. ఒకానొక టైంలో వెబ్సైట్లు, యూట్యూబర్లు నా పర్సనల్ లైఫ్ గురించి రాసిన రాతలకు భయపడి బయటకు రావడానికే భయపడ్డాను. నేనేదో తప్పు చేసినట్లు ఫేస్ చాటేశాను. నేను ఎన్నో ఏళ్లు డిప్రెషన్లో ఉన్నాను. ఆ బాధనంతా లోపల లోపల అణచిపెట్టుకోవడం వల్లే నాకు ‘క్రాన్స్’ అనే ఆటో ఇమ్యూన్ డిసీజ్ వచ్చింది. ఇది ఇంటెస్టైన్స్ (ప్రేగులు)లో తీవ్రమైన ఇన్ఫ్లమేషన్ కలిగిస్తుంది. ఇప్పటికీ నేను దాంతో ఫైట్ చేస్తున్నాను. నాకు కొంచెం స్ట్రెస్ పెరిగినా శరీరం అంతా విపరీతమైన నొప్పులు వస్తాయి” అని చెప్పారు.
“నా బాధలను నేను ఇంట్లో ఎవరికీ చెప్పుకోలేకపోయాను. ఎందుకంటే మా ఫ్యామిలీ మొత్తానికి నేనే ఒక పిల్లర్ లాంటిదాన్ని. నాలాంటి విమెన్ క్రాక్స్ ఇస్తే.. ఆ బిల్డింగ్ మొత్తం కూలిపోతుంది, నా కుటుంబం రోడ్డున పడుతుంది. అందుకే లోపల ఎంత ఏడ్చినా, సాయంత్రం ఇంటికి రాగానే పిల్లలతో ఆడుకుంటూ ఆ ఒత్తిడిని జయించేదాన్ని. నా నవ్వు, నా ఏడుపు, నా హస్కీ వాయిస్.. ప్రతి దాన్ని ఈ సొసైటీ జడ్జ్ చేస్తూనే ఉంది.” అని సునీత అన్నారు.