Mumbai Indians: సీజన్ ఆరంభంలో విజయం సాధించిన ముంబై, ఆ తర్వాత వరుసగా నాలుగు మ్యాచ్ల్లో ఓడిపోయి ప్లేఆఫ్ అవకాశాలను సంక్లిష్టంగా మార్చుకుంది. పంజాబ్ కింగ్స్తో జరిగిన మ్యాచ్లో 195 పరుగుల భారీ లక్ష్యాన్ని నిర్దేశించినప్పటికీ, బౌలర్ల వైఫల్యంతో పంజాబ్ ఆ లక్ష్యాన్ని కేవలం 16.3 ఓవర్లలోనే ఛేదించింది. ఈ ఓటమి తర్వాత కెప్టెన్ హార్దిక్ పాండ్యా మాట్లాడుతూ, జట్టులో కొన్ని కఠినమైన ప్రశ్నలకు సమాధానాలు వెతకాల్సిన సమయం వచ్చిందని, అవసరమైతే కఠిన నిర్ణయాలు తీసుకుంటామని హెచ్చరించాడు.
ఆటగాళ్ల బాధ్యతారాహిత్యంపై ఆగ్రహం..
జట్టు ప్రదర్శనపై హార్దిక్ అసంతృప్తి వ్యక్తం చేస్తూ.. “మేం కొన్ని కఠినమైన నిర్ణయాలు తీసుకోవాల్సి ఉంది. పరిస్థితులు అవే సర్దుకుంటాయని ఆశించడమా లేదా మార్పులు చేయడమా అనేది తేల్చుకోవాలి. ఇది వ్యక్తిగత సమస్యనా, జట్టు సమస్యనా లేక ప్రణాళికా లోపమా అనేది సమీక్షించుకుంటాం” అని పేర్కొన్నాడు. ఆటగాళ్లు తమ బాధ్యతను సక్రమంగా నిర్వహించకపోతే జట్టులో చోటు కోల్పోక తప్పదని ఆయన మాటల ద్వారా స్పష్టమవుతోంది.
బుమ్రా, సూర్యకుమార్ యాదవ్ అవుట్?
ప్రస్తుతం ముంబై జట్టులో కీలక ఆటగాళ్ల ఫామ్ ఆందోళన కలిగిస్తోంది. ముఖ్యంగా స్టార్ బౌలర్ జస్ప్రీత్ బుమ్రా ఈ సీజన్లో ఆడిన ఐదు మ్యాచ్లలో ఇప్పటివరకు ఒక్క వికెట్ కూడా తీయలేకపోయాడు. మరోవైపు స్టార్ బ్యాటర్ సూర్యకుమార్ యాదవ్ కూడా వరుసగా విఫలమవుతున్నాడు. హార్దిక్ పాండ్యా చేసిన ‘కఠిన నిర్ణయాలు’ అనే వ్యాఖ్యలు వీరిద్దరినీ ఉద్దేశించినవేనా అని అభిమానులు అనుమానిస్తున్నారు. తదుపరి మ్యాచ్లో ఈ స్టార్ ఆటగాళ్లకు విశ్రాంతినిచ్చి కొత్త రక్తాన్ని జట్టులోకి తీసుకునే అవకాశం ఉందని ప్రచారం జరుగుతోంది.
ప్లేఆఫ్ చేరడం గగనమేనా!
ప్రస్తుతం పాయింట్ల పట్టికలో తొమ్మిదో స్థానానికి పడిపోయిన ముంబై, ఇకపై జరిగే ప్రతి మ్యాచ్లోనూ గెలవాల్సిన పరిస్థితి ఏర్పడింది. బౌలింగ్ విభాగం పూర్తిగా తేలిపోవడం జట్టుకు పెద్ద మైనస్గా మారింది. వరుస ఓటములతో కుంగిపోయిన జట్టులో ఆత్మవిశ్వాసం నింపడం హార్దిక్కు పెద్ద సవాలుగా మారింది. ఏప్రిల్ 19న జరిగే తదుపరి పోరులో ముంబై ఏ విధమైన మార్పులతో బరిలోకి దిగుతుందో చూడాలి. ఒకవేళ అక్కడ కూడా ఓడిపోతే ముంబై ప్లేఆఫ్ రేసు నుంచి దాదాపు నిష్క్రమించినట్టే అవుతుంది.
మరిన్ని క్రీడా వార్తల కోసం ఇక్కడ క్లిక్ చేయండి..