భారత క్రికెట్ రంగంలో సరికొత్త స్పిన్ సంచలనంగా దూసుకొస్తున్న యువ లెఫ్ట్ ఆర్మ్ స్పిన్నర్ మానవ్ సుతార్ సరికొత్త మైలురాయిని అందుకున్నాడు. ఇంగ్లాండ్ ప్రతిష్టాత్మక కౌంటీ క్రికెట్లో ఆడేందుకు ఆయనకు పిలుపు వచ్చింది. వార్విక్షైర్ కౌంటీ క్రికెట్ క్లబ్తో మానవ్ సుతార్ స్వల్పకాలిక ఒప్పందాన్ని కుదుర్చుకున్నాడు. ప్రస్తుత కౌంటీ ఛాంపియన్షిప్లో భాగంగా రాబోయే రెండు రౌండ్ల మ్యాచ్లలో ఆయన వార్విక్షైర్ (బేర్స్) జట్టు తరఫున బరిలోకి దిగనున్నట్లు సదరు క్లబ్ అధికారికంగా ప్రకటించింది.
అరంగేట్రంలోనే అదరగొట్టిన సుతార్..
కేవలం వారం రోజుల క్రితమే ఆఫ్ఘనిస్తాన్తో జరిగిన ఏకైక టెస్ట్ మ్యాచ్ ద్వారా మానవ్ సుతార్ భారత జాతీయ జట్టులోకి అరంగేట్రం చేశారు. తన తొలి అంతర్జాతీయ మ్యాచ్లోనే అద్భుతమైన స్పిన్ మాయాజాలంతో ప్రత్యర్థి జట్టును ముప్పుతిప్పలు పెట్టారు. మొదటి ఇన్నింగ్స్లో కేవలం 33 పరుగులిచ్చి 6 వికెట్లు పడగొట్టగా, రెండో ఇన్నింగ్స్లో 29 పరుగులిచ్చి ఒక వికెట్ సాధించారు. మొత్తంగా 7 వికెట్లతో అరంగేట్రంలోనే అత్యుత్తమ ప్రదర్శన చేసి అందరి దృష్టిని ఆకర్షించారు. 23 ఏళ్ల ఈ యువ స్పిన్నర్కు టెస్ట్ అరంగేట్రానికి ముందే 29 ఫస్ట్-క్లాస్ మ్యాచ్లలో 129 వికెట్లు తీసిన అద్భుతమైన ట్రాక్ రికార్డ్ ఉంది.
వార్విక్షైర్ యాజమాన్యం హర్షం..
భారత జట్టులో అత్యంత ప్రతిభావంతుడిగా గుర్తింపు తెచ్చుకున్న మానవ్ను తమ జట్టులోకి ఆహ్వానించడంపై వార్విక్షైర్ పర్ఫార్మెన్స్ డైరెక్టర్ జేమ్స్ థామస్ సంతోషం వ్యక్తం చేశారు. “మానవ్ సుతార్ను మా బేర్స్ కుటుంబంలోకి స్వాగతించడం చాలా ఆనందంగా ఉంది. ఈ సీజన్లో మా జట్టు ఇప్పటికే మంచి రెడ్-బాల్ క్రికెట్ ఆడుతోంది. మానవ్ రాకతో మా బౌలింగ్ విభాగానికి సరికొత్త బలం చేకూరుతుంది. గత వారమే భారత టెస్ట్ జట్టుకు ఎంపికయ్యాడంటేనే అతనికి అక్కడ ఎంతటి గుర్తింపు ఉందో అర్థమవుతోంది. అలాంటి ఆటగాడు మా గ్రూప్లో ఉండటం గొప్ప విషయం” అని థామస్ పేర్కొన్నారు.
టైటిల్ వేటలో సాయపడతా..
ఈ కౌంటీ అవకాశంపై మానవ్ సుతార్ స్పందిస్తూ.. “వార్విక్షైర్ జట్టు తరఫున తదుపరి రెండు కౌంటీ ఛాంపియన్షిప్ మ్యాచ్లు ఆడేందుకు నేను ఎంతో ఉత్సాహంగా ఉన్నాను. ఈ సీజన్ను మా జట్టు చాలా బలంగా ప్రారంభించింది. ఈ లీగ్లో జట్టు టైటిల్ సాధించే దిశగా నా వంతు అత్యుత్తమ ప్రదర్శన ఇచ్చి సహాయపడతానని ఆశిస్తున్నాను” అని తన ఆనందాన్ని పంచుకున్నాడు. జూన్ 12 నుండి 15 వరకు స్కార్బరోలో యార్క్షైర్తో జరిగే మ్యాచ్లో, ఆ తర్వాతి వారం టౌంటన్లో సోమర్సెట్తో జరిగే మ్యాచ్లో మానవ్ అందుబాటులో ఉంటాడు.