వైవిధ్యమైన పాత్రలతో ఇండస్ట్రీలో తనకంటూ ఓ గుర్తింపు తెచ్చుకున్న నటి వరలక్ష్మి శరత్కుమార్పై ‘పోలీస్ కంప్లైంట్’ దర్శకుడు సంజీవ్ మేగోటి సంచలన వ్యాఖ్యలు చేశారు. అగ్రిమెంట్ నిబంధనలను ఉల్లంఘించి, సినిమా ప్రమోషన్స్కు ఆమె మొహం చాటేయడం వల్ల తమ చిత్రానికి ఊహించని స్థాయిలో భారీ నష్టం వాటిల్లిందని ఆయన తీవ్ర ఆగ్రహం వ్యక్తం చేశారు. హారర్, యాక్షన్, థ్రిల్లర్ అంశాలతో తెరకెక్కిన ‘పోలీస్ కంప్లైంట్’ జూన్ 12న తెలుగు, కన్నడ భాషల్లో ప్రపంచవ్యాప్తంగా విడుదలకు సిద్ధమవుతోంది. ఈ క్రమంలో హైదరాబాద్లో నిర్వహించిన ప్రీ-రిలీజ్ ఈవెంట్లో దర్శకుడు సంజీవ్ మేగోటి వరలక్ష్మి ప్రవర్తనపై బహిరంగంగానే అసంతృప్తి వెళ్లగక్కారు.
“ఈ చిత్రంలో వరలక్ష్మి శరత్కుమార్కు ఆమె కెరీర్లోనే గుర్తుండిపోయే పవర్ఫుల్ పాత్ర లభించింది. షూటింగ్ సమయంలో ఆమె సౌకర్యం కోసం నిర్మాత ఎక్కడా రాజీ పడకుండా అన్ని విధాలా సహకరించారు. కానీ, ఆమె మాత్రం కనీస బాధ్యత లేకుండా ప్రవర్తించింది. డబ్బింగ్ చెప్పేటప్పుడు కూడా మాకు ఎన్నో ఇబ్బందులు సృష్టించింది” అని దర్శకుడు ఆవేదన వ్యక్తం చేశారు. సినిమా ప్రమోషన్స్ కోసం కేవలం ఒకే ఒక్క గంట సమయం కేటాయించమని బతిమాలినా ఆమె స్పందించలేదని దర్శకుడు సంజీవ్ మేగోటి పేర్కొన్నారు. అగ్రిమెంట్ ప్రకారం ప్రమోషన్స్లో పాల్గొనాల్సిన బాధ్యత ఉన్నప్పటికీ, పూర్తి రెమ్యునరేషన్ తీసుకున్న తర్వాత ఇలా హ్యాండ్ ఇవ్వడంపై మేకర్స్ మండిపడుతున్నారు. తమ సినిమా కాన్సెప్ట్ అయిన ‘చైన్ రియాక్షన్ ఆఫ్ కర్మ’ తరహాలోనే, చేసిన తప్పుకు ‘కర్మ’ ఆమెను కూడా వదిలిపెట్టదంటూ దర్శకుడు సంజీవ్ మేగోటి సంచలన వ్యాఖ్యలు చేశారు.